Búgin Qazaqstan Respýblıkasy Premer-Mınıstriniń orynbasary Imanǵalı Tasmaǵambetovtiń tóraǵalyǵymen Alashorda qozǵalysynyń qurylǵanyna 100 jyl tolýyna oraı Alash zıalylarynyń shyǵarmashylyq muralaryn zerdeleý jáne ony jandandyrý máseleleri boıynsha keńes ótti dep habarlaıdy «Qamshy» portaly.
Bul rette, Alash qozǵalysynyń táýelsizdik murattary úshin kúrestegi róli men mańyzyn, onyń kóshbasshylarynyń saıası-quqyqtyq, ulttyq qundylyqtarǵa qatysty kózqarastaryn, tujyrymdaryn jańa zamannyń talaptaryna saı zerdeleý óte mańyzdy.
«HH ǵasyrdyń basynda ulttyń zıalylary azattyq úshin bolǵan kóp ǵasyrlyq kúreste mańyzdy ról atqardy. «Alash» alǵashqy saıası partıasy jáne Alash Orda úkimetiniń paıda bolýy azamattyq kemeldengen jáne halyqtyń bolashaq taǵdyryn sheshe alatyn qazaqtyń saıası zıalylarynyń joǵarǵy áleýetin kórsetti», - dep atap ótti QR Premer-Mınıstriniń orynbasary Imanǵalı Tasmaǵambetov.
Bul oraıda, vıse-premer elimizdegi Alashtanýshy tarıhshylar men ádebıetshiler, otandyq kıno jáne televızıa salasynyń mamandarymen birlese otyryp, tyń bastamalardy – kitap shyǵarý, kıno túsirý máselesin qolǵa alý qajettigine toqtaldy.
«Alashtyń 100 jyldyǵyna durystap daıyndalýymyz kerek. Qazir eń bastysy, jaqsy jospar qurýymyz qajet. Oǵan bir-eki aptadaı ýaqyt alyp, durys jospar quryp, ony Elbasymen kelisip, ýaqytyn belgilegen jón. Alashtyń 100 jyldyǵy sol zamanmen qalyp qoımaı, búgingi táýelsiz memleketpen baılanystyrý oryndy bolady. Alash zıalylarynyń armany, onyń oryndalǵany, táýelsiz el bolǵanymyz, osynyń barlyǵy ulttyq, tarıhı sanany kóteretin jaqsy dúnıe bolýy kerek», - dedi vıse-premer Imanǵalı Tasmaǵambetov.
Sonymen qatar, keńes barysynda Ahmet Baıtursynuly mýzeı-úıin memlekettik menshikke berip, onyń mártebesin respýblıkalyq deńgeıge kóterý, ǵalymnyń ǵylymı eńbekteriniń 10 tomdyǵyn jaryqqa shyǵarý máselesi qaraldy.
Imanǵalı Tasmaǵambetov A. Baıtursynov jáne «Alash» qozǵalysy jóninde derekti fılm túsirý máselesin jedel túrde qolǵa alý qajettigin atady.
Keńes qorytyndysy boıynsha vıse-premer Imanǵalı Tasmaǵambetov QR Mádenıet jáne sport mınıstrine Alash Orda úkimetiniń qurylýy men qalyptasýyna atsalysqan ult zıalylarynyń ómirbaıanyn zerttep, olar jóninde kórkem ómirbaıandyq kitap shyǵarýdy jáne Ahmet Baıtursynov ǵylymı eńbekteriniń 10 tomdyǵyn basyp shyǵarýdy tapsyrdy.
Aldaǵy ýaqytta Ahmet Baıtursynulynyń mýzeı úıiniń ǵımaraty respýblıkalyq mańyzy bar Tarıh jáne mádenıet eskertkishteriniń memlekettik tizimine engiziletin bolady.
QR Bilim jáne ǵylym mınıstrine mýzeı-úıdi memlekettik menshikke alý jáne ony A. Baıtursynov atyndaǵy Til bilimi ınstıtýty janynan A. Baıtursynuly mýzeı-úıi – ǵylymı ortalyǵy retinde qurý tapsyryldy.
Eske sala keteıik, byltyrǵy jyldyń Jeltoqsan aıynda «Qamshy» portalynda «Memleket qaraýynsyz qalǵan iri memleket qaıratkeriniń úıi» atty maqala jarıalanyp, Baıtursynuly murajaı úıiniń máselesin kótergen bolatyn. Soǵan baılanysty ótken aptada QR Premer-Mınıstriniń orynbasary Imanǵalı Tasmaǵambetov Almaty qalasyna is-sapar aıasynda Ahmet Baıtursynuly murajaı úıinde bolyp, onyń jumysymen tanysqan edi.
