Dımash Qudaıbergenniń ákesi Qanat Aıtbaev óziniń facebook áleýmettik paraqshasynda Dımashty synaǵan Murtaza Bulutaıǵa jaýap qaıtardy:

«Bulytaı Dımashty meńzep: "Qazaqty álemge tanytý degendi qalaı túsinemiz osy?! Qyzdarymyz shetinen sulý, uldarymyz shetinen jińishke daýyspen keremet án aıtady dep pe?!? Bul qate pikir. Biz qazaqty bilimdiligimizben, ónimdiligimizben, eńbekshildigimizben, joǵary tehnologıalyq ónimderimizben, zıatkerlik áleýetimizben ǵana shynaıy tanyta alamyz» — depti.
Bulytaı myrza, sonda, sizdiń oıyńyzsha, mýzyka, óner, eńbek emes eken ǵoı? Bul sala zıatkerlikke de jatpaıtyn shyǵar? Jeti jyl mýzyka mektebinde, odan soń tórt jyl kolejde, bes jyl joǵary oqý ornynda oqyp, kúni – túni aspaptyń janynda daıarlanyp, ózin-ózi shyńdap, el atynan óner kórsetý úshin ter tógý — sizdiń oıyńyzsha erikkenniń ermegi eken ǵoı?
Mýzykanyń qyr-syryn meńgerip, memlekettiń atynan shet jerde synǵa túsý úshin qanshama oqyp, til úırenip, repertýar daıarlap, qıyn partıalardy jattap, izdený de, sizdińshe, bilimdilikke jatpaıdy eken ǵoı? 
«Qazaqtyń uldary men qyzdary qandaı kelbetti, talantty!» - dep basqa elder súıinse, nege shymbaıyńyzǵa batady? Álde sizge qazaqty usqynsyz etip kórsetken unaı ma? Onyń astarynda ne bar?
Ánshige pikir aıtý úshin eń bolmasa vokal jónindegi eń qarapaıym uǵymdardan habardar bolý kerek. Dımash siz aıtqandaı «jińishke daýysty ánshi» emes, «tómengi regıstrde de, koloratýralyq sopranolar ǵana aıta alatyn joǵary notalardy da erkin shyrqaı alatyn, daýys dıapazony óte keń, sırek kezdesetin ánshi» - dep Qazaqstan, Belarýs, Ázerbaıjan, Ýkraına, Qyrǵyzstan, Túrkıa jáne Qytaıdyń eń bedeldi mýzyka mamandary baǵa bergen ónerpaz. Muny bári – tabıǵı jaratylyspen qosa siz óner adamdaryna buıyrtqyńyz kelmeı otyrǵan tynymsyz eńbektiń nátıjesi! 
«...bul baıqaýǵa Dımashtyń qatysýy – qytaılardyń saıasaty» - depsiz. Qazirgi zamanda adamzat jabyq qoǵamda ómir súre ala ma? Álemde kóptegen sporttyq jarystar, olımpıadalar, óner dodalary, mýzykalyq festıválder, konkýrstar t.b. kóptep ótkizilip jatady. Negizgi maqsaty – eldi tanytý. Qazaqstannyń atynan talaı azamattarymyz kóptegen sharalarǵa qatysyp jatady, sonyń bárinen saıasat izdeımiz be? Ár salanyń mamandary múmkindiginshe elimizdiń áleýetin kóterip, memleketimizdi jaqsy qyrynan tanytýǵa talpynsa nesi aıyp? Qanshama jigitterimiz ben qyzdarymyz halyqaralyq deńgeıde jaqsy jetistikterge jetip, júldelermen oralyp jatyr, solardyń barlyǵynyń jeńisinen jymysqy saıasattyń astaryn izdeımiz be?
Dımash bul saıysqa bizdiń jeke qalaýymyzben (!) Qytaı tarapyna usynys túsirgennen keıin birneshe irikteý kezeńinen ótip, kásibı sheberligin tolyq dáleldegennen keıin ǵana qatysýǵa joldama aldy. 
Bul doda, siz oılaǵandaı, qazaqty aldaýsyratý úshin oılastyrylǵan joba emes, birneshe jyl qatarynan ótkizilip kele jatqan, Eýropa men Azıanyń túrli elderiniń eń tanymal, kásibı ánshileri ǵana qatysa alatyn televızıalyq konkýrs. 
"Asyqpańyz, áli bul doda 4-5 aıǵa ulasatyn shyǵar, sol kezde jartylaı qytaı nemese qytaısúıgish bolyp ketkenimizdi ózimiz de baıqamaı qalatyn shyǵarmyz. Osy kúnniń ózinde "sheshe, sheshe" dep post jazyp jatqandar bar, birneshe aptadan soń "nıhao" dep ketedi", — deısiz.
Osyǵan deıin Dımash Qazaqstannyń atynan slaván memleketterinde óner kórsetip, tanymal bolǵan edi. Alla buıyrtsa, Eýropa, Amerıkadaǵy syndarǵa da barar. Onda da Dımashtyń qatysýyn sol elderdiń saıasatymen baılanystyramyz ba? Al qazirgi keıbir qazaqtyń ana tilin bilmeı, kórshi memlekettiń tilinde sóıleıtindigi úshin keıbir adamdardyń ult múddesin qoldan berip júrgendigi úshin, otanshyl emestigi úshin Dımashtyń qandaı kinási bar?!?
Marqum naǵashy ájem «Ózińe óziń myqty bol, qońsyńdy ury tutpa» dep otyrýshy edi. Árıne, sheteldiń yqpalynan saqtanǵan durys. Ol úshin árqaısymyz óz otbasymyzdy myqty ustaýymyz kerek. Ata-anadan durys tárbıe kórgen ul-qyz kóringenniń jeteginde ketpeıdi. Soǵan kúsh salaıyq! Ónerge, bilimge, jańa tehnologıany ıgerýge úıreteıik. Ata-babamyzdyń rýhyn, ultshyldyqty boıyna sińireıik. «Seniń árbir jeńisiń — qazaqtyń jeńisi» deıik. Sonda bizge eshkim de yqpal ete ala almaıdy. 
Al endi birimiz shyńǵa órmelep bara jatqanda ekinshimiz onyń balaǵyna jarmasyp jatsaq, el múddesi týraly áńgime aıtýdyń ózi artyq...»

Birer mınýt buryn Murtaza Bulutaı meni durys túsinbedińizder dep facebook paraqshasynda aqtalǵandaı boldy. «Biraz adamdar meni durys túsinbeı jatyr, jas ánshiniń talantynyń ashylǵanyn kóre almaı jatyr deıdi, áste olaı emes, birinshiden men ánshi emespin, baqtalastyǵym joq, qazaqtyń ár balasynyń baǵy jansyn dep tileımin. Al ekinshiden, ózim ǵylymmen aınalysyp júrgendikten, ásirese saıasattaný, mádenıettaný, áleýmettaný, dintaný zertteý taqyryptarym bolǵan soń, halyqaralyq saıasat pen ekonomıkany kúndelikti qadaǵalap turǵan soń analıtıka ózdiginen shyǵyp jatyr, meniki esten tanbaıyq, shalqadan qulamaıyq degen bir selt eter ǵoı...» deıdi Murtaza myrza.

Esterińizge sala keteıik, osyǵan deıin Murtaza Bulutaı óziniń facebook paraqshasynda Dımash Qudaıbergendi bylaı dep synaǵan bolatyn:

«Osy bir telejobany qoǵamdyq lıhoradkaǵa aınaldyrmaý kerek, osy joba arqyly enetin mádenı, saıası yqpaldarǵa saqtyq tanytqan jón, rasıonaldy oılap, rasıonaldy baǵa bergenimiz durys bolar. Sonsoń, bul jobada jeke tulǵalar jarysyp jatyr, ulttar ne memleketter emes, sondyqtan qytaılardy jeńdik, qytaılardy qorqyttyq, búkil qytaı moıyndady tb degen sıaqty dańǵaza urandardan aýlaq bolaıyq...

Sen de aıtady ekensiń! Ol joba men bul joba bir me?! Ámire atamyzdy sol zalda otyrǵan adamdar ǵana estidi, qansha adam deısiń? Ol kezde ınternet joq, qazirgideı sms arqyly daýys jınaý joq qoı. Qazir bul shoý-bıznes dep atalady, bıznestiń jeke salasyna aınalǵan, álem boıynsha barlyq elderde osyndaı telejobalar júrip jatyr. Ámire atamyzdyń Parıjge baryp, dombyramen bir-eki án aıtýyn myna telejobaǵa teńegeniń kúlkili eken. Jalpy biz osy qýanýymyzdy, ashýlanýymyzdy, jaqsy ne jek kórýimizdi, adamdardy maqtaýymyzdy ne dattaýymyzdy salqynqandylyqpen, aqylǵa salyp, baısaldylyqpen jasaı almaıtyn halyqpyz. "Búkil álemdi moıyndattyq!", "Búkil Qytaı moıyndady", "Aspan asty eli tamsandy!", "Qytaıdy qorqyttyq!", "Qytaılardy jeńdik!", ámbesine osynyń bári qandaı bir ónerkásip, óndiris, tehnologıa, ekonomıkalyq qýat jaǵynan aıtylyp jatqan joq, bolǵany bir ánshiniń bir telejobada ozyp shyqqany nemese hokeı komandamyzdyń olardy jeńýi sıaqty ýaqytsha nárseler ǵana...»