Allany aýyzǵa maltap, júnge (saqalǵa) jabystyrǵan farıseı pátshaǵarlar tómendegi mysaldy tereńirek túsinse, kóp ǵıbrat alar edi.
Estelik 1964 jyly Eskendir esimdi aqsaqaldyń aýyzynan jazylyp alynǵan eken (Qazaqtyń ata zańdary, IX tom, 196 bet)
***

Bir jyly Abaıdyń úıinde kóp kisi tústenip otyrsa, Kótbaq qara Qazybek deıtin ósekshi, qydyrmashy kirip kelipti. Ol esikten kire sálem berip: 
– E, qudaı aıdap, buıyrǵan taǵamǵa kez kelgenimdi qarashy, – dep qolyn jýmastan tabaqqa qaraı entelep kele jatsa, Abaı zildi únmen:
Qaıda barasyń óńmeńdep, otyr sol jerge, – depti. Qazybek ne derin bilmeı sylq etip otyra ketipti. 
Abaı Qazybekti qaıyryp tastaǵan soń bir sóz aıtpastan, qonaqtarymen etti jeı beripti. Et artynan shaı ishilipti. Qazybekti shaıǵa da shaqyrmapty. Tamaq iship bolysymen jurttyń bári shyǵyp bara jatqanda Qazybek te kete bermek bolyp túregelgende, Abaı «otyr» dep ıshara jasapty. Qazybek qaıyra otyrypty. Sonda Abaı:
Sen óziń ósek jınaısyń, bireýdiń daýyn satyp alyp, aıtysqa túsesiń. Osynyń bári bir qudaıdyń buıryǵy ma? – depti. Qazybek eshteńe dep úndeı almapty. 
Al sen jańa «Qudaı aıdap, buıyrǵan taǵamǵa tap keldim-aý» dep ediń. Buıyrdy ma sol taǵam, joq pa? – depti. Qazybek:
Buıyrmady, – depti. Abaı:
Ol solaı. Sen as úshin aryńdy satyp, buıyrmaǵan astan ishemin dediń. Ony buıyryp tur dediń. Káne, buıyrǵany. Onan da «qańǵyryp júrip as ústine kez boldym-aý» dep nege aıtpadyń? Jeıtin tamaǵyńdy shynyńdy aıtyp jeseń neń ketedi, – dep ursypty. Sonda Qazybek otyryp:
Abaı, qazaqtyń bir yrym salty bar-tyn. Úlkenin syılaýshy edi, tym bolmaǵanda saqalymdy syılasań etti, – depti. Sonda Abaı:
Saqalyn satqan káriden, eńbegin satqan bala artyq. Seniń úlkendigiń men saqalyńnyń qadirli ekendigi ras. Biraq sonyń qadirin óziń ketirip júrsiń ǵoı. Óziń syılamaǵan saqaldy jurt ne qylsyn? – dep jaýap qatqan eken.

Yqylas Ojaıulynyń Facebook paraqshasynan