AQSH-tyń jańa prezıdenti Donal Tramptyń júrgizip otyrǵan saıasatyna qatysty shet elde júrgen Qazaqstandyq Joldas Órisbaev atty azamat óziniń Facebook áleýmettik jelisindegi paraqshasynda jazady. Tramptyń qabyldaǵan jarlyqtary men Green Card jobasynyń AQSH halqyna qalaı áser etip jatqandyǵy jaıly saraptama júrgizip, Islam Respýblıkalaryna qatysty shyǵaryp otyrǵan sheshimderdiń mańyzyn jáne AQSH-ta turatyn ózge ult ókilderiniń bildirgen narazylyqtarynyń mánin aıta ketedi. Sonymen qatar Donald Trampqa deıingi prezıdentterdiń taqtan qalaı ketkendigi jaıly sholý jasap ótedi.
"Tramp Aq Úıden ýaqytynan erte ketken AQSH-tyń altynshy prezıdenti bolýy múmkin. Osyǵan deıin Lınkoln, Garfıld jáne Kennedı prezıdenttik posty kezinde atylyp ketken bolsa, Franklın Rýzvelt naýqastanyp, ómirden ótedi. Al Nıksonǵa Ýotergeıt máselesine qatysty ımpıchment jarıalanady.
Anti-Obama
Donald Tramp óziniń Prezıdent statýsyndaǵy on kúnde birtalaı ózgerister jasap úlgerdi. Kelgen kúni Obamaǵa qasarysyp, jalpyǵa birdeı medısınalyq saqtandyrýdy (tabysy tómen azamattarǵa tegin) joqqa shyǵardy. Taǵy da, burynǵy prezıdenttiń sheshimderimen kelispeıtinin syrtqy saýdadaǵy birtalaı kelisimderdiń kúshin joıýmen kórsetti. Reseımen qarym-qatynasty jaqsartyp, NATO áreketterine kedergi keltirýi múmkin. Oǵan Kongrestegi respýblıkalyqtar da, demokrattar da qarsy bolǵanyn bilesiz.
Anti-Mexicans
Sosyn Meksıkamen shekaraǵa qabyrǵa kóterip, oǵan ketetin qarjyny Meksıkaǵa mindetteıtinin málimdedi. Ol qalaı deısiz be? Jalpy Meksıkanyń AQSH-qa eksport jasaıtyn taýarlaryna mejelengen salyqty 20 paıyzǵa kóterip, sol qarjyny qabyrǵa kóterýge jumsamaq. Qazirgi tańda AQSH halqynyń 35 paıyzyn Ortalyq nemese Ońtústik Amerıkadan kelgen azamattar quraıdy. Olar Tramptyń áreketine qarsylyǵyn tanytyp otyr. Sebebi Tramp myrza elde zańsyz eńbek etip júrgen latynamerıkalyqtardy qatań qadaǵalaýdy mindettep otyr.
Anti-Muslims
Tramptyń ótken jumadaǵy jarlyǵy amerıkalyqtar arasynda taǵy bir narazylyq tolqynynyń paıda bolýyna negiz boldy. Ol "terorızmge qoldaý kórsetip júr" degen aıyppen 7 musylman elinen kelgen "saıası qashqyn" nemese "ımıgranttardy" ýaqytsha qabyldamaý (90-120 kún) týraly qujatqa qol qoıdy. Rasynda Green Card prosesi bastalǵaly beri tizimdegi Sırıa (12 587), Irak (9 880), Somalı (9 020), Sýdan (1 458), Iran (3 750), Iemen (26) jáne Lıvıa (1) syndy elderden 36 722 azamat kelgen. Bloomberg málimetine oraı, olardyń eshbiri AQSH terıtorıasynda terrorlyq áreketpen kózge túspegen. Sonyń ózinde Tramptyń tizimine enip otyr. Oǵan, árıne, ózge de saıası sebepter bar ekeni belgili.
Prezıdent Tramp dál osy musylman elderine qatysty buıryǵyn oryndaýǵa qarsy bolǵan Joǵarǵy Sot basshysyn ornynan alyp tastady. Búgin ózge bir úmitkerdi Joǵarǵy Sotqa basshy etip taǵaıyndady.
Anti-International Employee
Odan bólek, Tramp AQSH terıtorıasynda resmı jumys isteýge ruqsat etetin H1B vızasyn shekteý týraly máseleni kóterdi. Oǵan Microsoft, Google, Facebook jáne ózge de High-Tech kompanıalar qarsy ekenin bildirdi. Sebebi Sılıkondy alqaptaǵy kóptegen kompanıalarda sheteldik baǵdarlamashylar eńbek etedi. Tramp bul sheshimin AQSH azamattaryn jumyspen qamtý maqsatynda jasaıtynyn málimdedi.
Anti-Immigrants (Green Card)
Amerıka Qurama Shtattaryn ımıgranttar qurǵan. Sońǵy úsh ǵasyrda álemniń túkpir-túkpirinen ulty men násili basqa bolǵan azamattar kóship kelgen. Osy úderisti jalǵastyrý maqsatynda, Green Card (Permanent Resident) lotereıasy uıymdastyrylǵan bolatyn. Endigári, kez kelgen ımıgranttyń keısi jekeleı qatań túrde qaralatynyna zańdastyrý kerek ekenin aıtyp otyr. Osy ózgeristiń ený múmkindigin eskerip, Trampqa AQSH-taǵy alyp qalalardyń ákimderi boıkot jarıalady.
P.S. Tramptyń postqa kelgenin nebári 10 kún boldy. Rasynda, AQSH prezıdentiniń sheshimderimen kelispeıtinder sany kún saıyn artyp keledi. Bul, árıne, ımpıchmentke alyp keledi. Eger Tramp myrzamen Reseımen qoıan-qoltyq aralasatyn bolsa, onda mindetti túrde posttan aıyrylyp qalady", - dep jazady Joldas.
