Qazaqstandyq ánshi Dımash Qudaıbergenov Qytaıda ótip jatqan I Am a Singer baıqaýynda vokaldyq ónerimen búkil halyqty tánti etip jatyr. Baıqaýdyń alǵashqy kezeńinde Dımash fransýz tilinde SOS d’un terrien en détresse ánin oryndasa, ekinshi kezeńde Vıtastyń "Opera №2" ánin sátti oryndap shyqty. Sanaýly kúnderdiń ishinde Dımashtyń Qazaqstan men Qytaıda súıip tyńdaıtyn jankúıerleri paıda boldy dep jazady tengrinews.kz.
Dımashtyń anasynyń aıtýynsha, olar kúnine eki ret - tańerteń jáne keshke sóılesip turady.
"Biz búgin tańerteń ǵana sóılestik. Ol daıyndyqtyń qalaı ótip jatqanyn aıtyp berdi, barlyǵy jaqsy sıaqty. Onyń daýsynan-aq materıaldy 100 paıyzǵa biletinin túsindim. Bul onyń orkestrmen jáne dırıjerlermen jaqsy qarym-qatynasta ekenin bildiredi. Daıyndyqtan shyǵypty, emosıaǵa toly. Dımash úshinshi kezeńde aǵylshyn tilinde án oryndaıdy. Ol bul ándi jaqsy biledi. Jaqsy óner kórsetedi dep oılaımyz", - dedi Svetlana Aıtbaeva. Onyń aıtýynsha, Dımash sáýir aıynyń sońyna deıin Qytaıda bolady. Sebebi, baıqaýdyń áli shamamen 10 kezeńi bar eken.
Dımash Kýdaıbergenov anasymen birge. © instagram.com/kudaibergenov.dimash
Svetlana Aıtbaeva kez kelgen ana sıaqty bóten elde júrgen uly úshin alańdaıdy.
"Árıne, biz ony sońǵy kezeńde deıin jetýin qalaımyz. Sebebi, bul úlken joba ári jobanyń baǵdarlamasy da óte qıyn. Ár kezeń saıyn bir qatysýshy shyǵady. Men ana retinde onyń barlyq 13 kezeńnen ótip, fınalǵa jetýin tileımin", - dedi Svetlana Aıtbaeva.
Sondaı-aq, Dımashtyń anasy Internette uly jaıly jarıalanyp jatqan jańalyqtardy mınýt saıyn qarap otyratynyn aıtyp ótti. Aıta keteıik, keshe BAQ-tarda reseılik ánshi Vıtastyń aryzy jaıly da aıtylǵan bolatyn, biraq keıinnen barlyq másele sheshilipti.
"Árıne, biz ýaıymdadyq. Dımashqa habarlastym. Biraq ol baısaldy túrde jaýap berdi. Ulymnyń atyna mundaı mazmundaǵy hat kelgen joq, ol aryz telearnaǵa (Hunan TV - avtor) túsken eken. Tanymal adamdardyń ózi osyǵan áser etip jatsa, demek Dımash ándi óte jaqsy oryndap shyqty! Vıtas Dımashtyń ónerin baǵalady degen sóz. Árıne, ulymnyń shyǵarmashylyq jolynda eshqandaı da qıyndyqtar bolmaǵanyn qalaımyn", - dedi ánshiniń anasy.
Anasynyń aıtýynsha, Dımash Qudaıbergenov mýzykamen bes jasynan bastap aınalysqan. Qazir Dımash 22 jasta, Aqtóbedegi Jubanov atyndaǵy mýzykalyq kolejdi aıaqtaǵan. Al qazir Dımash Astanadaǵy Qazaq ulttyq óner ýnıversıtetiniń 3-kýrs stýdenti eken.
Sondaı-aq, ánshiniń anasy Dımashtyń jeke ómiri jaıly da aıtyp berdi.
"Ol qyzdarmen qarym-qatynastary jaıly aıta bermeıdi, ıaǵnı, ázirshe onyń qyzy joq degen sóz. Qazir ol úshin eń bastysy - mýzyka jáne shyǵarmashylyq. Dımash bos ýaqytyn osyǵan arnaıdy, onyń áńgimeleriniń barlyǵy tek mýzyka men repertýar jaıynda. Árıne, biz Dımashty oqýyn aıaqtap, mansap jolyn quryp, úılenedi dep senemiz. Biz sol týraly armandaımyz jáne sol sátti kútemiz", - dedi ánshiniń anasy.
Al Dımash Qudaıbergenovtiń balalyq shaǵyndaǵy sýretterdi myna jerden kóre alasyzdar.
Aıta keteıik, Dımash Qudaıbergenov 28 qańtarda Qytaıda ótip jatqan I Am a Singer mýzykalyq konkýrsynyń ekinshi kezeńinde de jeńimpaz atanǵan bolatyn. Ánshi reseılik ataqty Vıtastyń "Opera 2" atty týyndysyn oryndaǵan edi. Vıdeony myna jerden kórýge bolady.
Al teleshoýdyń birinshi kezeńinde ánshi SOS d'un terrien en détresse ánin fransýz tilinde oryndap, jeńimpaz atanǵan bolatyn. Aıta keteıik, Dımash Qudaıbergenov qatysyp jatqan konkýrsta 14 kezeń bar. Konkýrs Qytaıdyń Chansha qalasynda ótip jatyr.
