Qazaqstan azamattary konstıtýsıada bolatyn keıbir ózgeristerge úzildi-kesildi qarsy bolyp jatyr dep habarlaıdy «Qamshy» tilshisi. Ásirese áleýmettik jelidegi qoldanýshylar, tanymal tulǵalardan bastap qarapaıym azamattarǵa deıin atalǵan baptaǵy ózgeriske qarsy tolqyp jatyr.
Túsindire ketetin bolsaq, 25 qańtarda «Qazaqstan Respýblıkasynyń Konstıtýsıasyna ózgerister men tolyqtyrýlar engizý týraly» Qazaqstan Respýblıkasy Zańynyń jobasyn búkilhalyqtyq talqylaý týraly prezıdent Nursultan Ábishulynyń jarlyǵy shyqqan bolatyn. 2017 jylǵy 26 qańtar - 2017 jylǵy 26 aqpan aralyǵynda ótkiziletin búkil halyqtyq talqylaýǵa usynylǵan «QR Konstıtýsıasyna ózgerister men tolyqtyrýlar engizý týraly» zań jobasyndaǵy 26 bapqa qatysty ózgertý tómendegideı:
1. 26-baptyń 1 jáne 2-tarmaqtary mynadaı redaksıada jazylsyn:
«1. Árkim zańdy túrde alǵan qandaı da bolsyn múlkin jeke menshiginde ustaı alady.
2. Jeke menshik quqyǵyna qol suǵylmaıdy. Menshikke, onyń ishinde muragerlik quqyǵyna zańmen kepildik beriledi. Eger Konstıtýsıada ózgeshe kózdelmese, zańdy jolmen alynǵan múlikke menshik quqyǵyn shekteıtin nemese odan aıyratyn zańdardy jáne ózge de quqyqtyq aktilerdi qabyldaýǵa jol berilmeıdi.».
Al, Konstıtýsıada bul bap:
26-bap
1. Qazaqstan Respýblıkasynyń azamattary zańdy túrde alǵan qandaı da bolsyn múlkin jeke menshiginde ustaı alady.
2. Menshik, onyń ishinde muragerlik quqyǵyna zańmen kepildik beriledi.», - dep kórsetilgen.
Másele mynadan týyndap otyr – qazirgi Konstıtýsıamyzda QR azamaty dep kórsetilse, al qazirgi ózgertpekshi bolyp otyrǵan bapta «QR azamaty» degen sózdi joıyp «árkim» jer men kásiporyndy satyp alýǵa ruqsat dep meńzep tur. Demek kez kelgen shetel azamaty jer men kásiporyndardy satyp alýǵa qaqysy bar degen sóz.
Osyǵan baılanysty «Qamshy» tilshisi áleýmettik jelidegi birneshe qarsylyq ýájderdi tizbelep kórdi.
Aıta keter bolsaq, Memleket basshysy búkilhalyqtyq talqylaýǵa shyǵarǵan «Qazaqstan Respýblıkasynyń Konstıtýsıasyna ózgerister men tolyqtyrýlar engizý týraly» Qazaqstan Respýblıkasy zańynyń jobasyna qatysty usynystar 2017 jylǵy 26 qańtardan 2017 jylǵy 26 aqpanǵa deıin myna mekenjaıda qabyldanady:
010000, Astana qalasy Esil aýdany Úkimet úıi Qazaqstan Respýblıkasy Prezıdenti Ákimshiliginiń Memlekettik quqyq bólimi, elektrondyq poshta – ap2017@akorda.kz
