Tájikstan Bilim jáne ǵylym mınıstrliginiń buıryǵyna sáıkes, JOO men mektepterdiń áıel oqytýshylary jáne oqýshy qyzdary naýryz aıynyń basynan aıaǵyna deıin atlas pen adras matalarynan tigilgen ulttyq kıim kıip júrýi tıis. Bul týraly Azattyq radıosynyń jergilikti ókildigi habarlady.

Bilim mınıstrliginiń baspasóz hatshysy Ehsonı Hýshvakt habarlaǵandaı, 1 naýryzdan bastap tájik qyzdary Naýryz merekesine baılanysty ulttyq kıimderin tastamaı kıip júrýlerine ruqsat berildi. Iaǵnı, bul ýaqytta olarǵa mektep formasyn kıý mindettelmeıdi.

Mınıstrliktiń resmı hatynda kórsetilgendeı, mundaǵy basty maqsat - ulttyq salt-dástúrlerdi jańǵyrtý jáne dástúrli emes ıslam aǵymdaryna qarsy kúresý bolyp tabylady.

Naýryz merekesi Tájikstanda 21-24 naýryz kúnderi aralyǵynda toılanatynyn atap ótý kerek. Ol eldegi eń negizgi merekelerdiń biri bolyp esepteledi.

Osydan eki jyl buryn Analar kúni (8 naýryz) merekesi qarsańynda el prezıdenti Emomalı Rahmon belsendi áıeldermen kezdesip, elde qara jamylǵan qyz-kelinshekterdiń kóbeıe bastaǵanyna alańdaıtynyn aıtqan bolatyn.

"Bizdiń áıelder eshqashan qara jamylmaǵan. Tipti, qazaǵa kıetin áıelderdiń kıimderi de bir tústi qara emes. Alaıda, tájiktiń keıbir qyzdary men áıelderi qap-qara kıimge oranyp júr. Olar bul kıimdi ne úshin kıip júrgenin bilmeıdi nemese bilgisi kelmeıdi", - dedi Emomalı Rahmon belsendi áıeldermen bolǵan kezdesýde.

Aıta keteıik, Tájikstanda ıslamnyń salafızm baǵytyn ustanýǵa zańmen tyıym salynǵan.