Jaza almaı júrgen jyrymdy, Jazypty qustar tilimen. Aıta almaı júrgen syrymdy, Jetkizdim jelge túnimen.   Bar muńnan qaldym shettelip, Baq taýyp biraq, ketpedim. Alqymǵa bir sóz keptelip, Jeter jerime jetpedim.   Qustar-aı, qustar qanattym, Qonbashy jerge, usha ber. Pyraq jyrymdy jarattym, Senderge arnap, qusha ber.   Alǵashqy aqynnyń únindeı, Qustardyń saıraǵan daýysy. Jumaqtyń nurlanǵan kúnindeı, Qus bitken oralsa taý ishi.   Baǵzy bir ǵasyrdan qalyqtap, Qanatyń qaıyrylmaı jettiń be? Azat bul aspanda sharyqtap, Erkińe taǵy da kettiń be?   Qustar-aı, qustar baýyrmal, Jyr bolyp túske enesiń. Izdemeı ketken baýyrlar, Qus bolyp qashan kelesiń?..  

  Bir sáýleniń erip kelem sońynan, Múmkin jolym ashylar, dep ońynan. Tań aldynda aǵyp túsken juldyzdy, Meıirli kún attandyrdy qolynan.   Aqıqattyń erip júrip qasyna, Keıde onyń qamshy uramyz basyna. Áldeqashan ólip ketken aqynnyń, Bir top ákim gúl qoıyp júr tasyna.   Maqsatyna jete almasa kózdegen, Pende shirkin min izdeıdi ózgeden. Bir suraqtyń baryn bilip júrsek te, Jaıshylyqta bolamyz biz sezbegen.   Ómir ǵoı bul aqqa kúıe jaǵatyn, Sabyrlylar taýyspaıdy taǵatyn. Aqyn dosym kúder úzbeı izdep júr, Baýy úzilip túsip qalǵan saǵatyn.   Sapardamyz, jyljı berer kóshi alǵa, Sulýlardy jaraldyq pa qusharǵa?! Bir sáýleniń jeteginde kelemin, Qanatym joq, aspan jaqqa usharǵa.  

  Topyraqqa jazsam deımin bir óleń, Aspan asty dúrligetin tańǵalyp. Sodan kenet sóılep ketse bir tilde, Álemdegi bar halyq.   Nege dersiń, oılanbastan tańyrqap, Irkilmesten keldi der em kezegim. Táńir ózi súıgen qulyn jarylqap, Óltirmesin sezemin.   Keler kúnnen bir uly toı kútemin, Pende bitken shattanar. Kúnshil dosty júndeı ǵylyp tútemin, Ótirigine maqtanar.   Jazylǵan jyr, kemeldikke barar jol, Jetermiz ne jetpespiz. Aqyn bolmaı adam bolyp ótsek te, Qap arqalap ketpespiz.   Barlyq shaıyr bir armannyń sońynda, Mýzasynyń jetegine baılanar. Sam jamyrap qaǵaz, qalam qolynda, Týǵan jerdiń topyraǵyna aınalar.  

  Oraq aı bultqa tyǵyldy, Kózdegi muńyn jasyryp. Burshaqtar jerge jyǵyldy, Alapamyzdy qashyryp.   Juldyzdar sińip túnekke, Sanamdy ýaıym jalmady. Daq túsip edi júrekke, Qasymda biri qalmady.   Qap-qara túnniń ajaryn, Kórgende kettim shalqalap. Jartykesh aıdyń nazaryn, Aq bulttar ketti arqalap.   Burymyn órgen sulýdaı, Túnniń de syryn túsinem. Teńizden shyqqan ulýdaı, Ótkenimdi eske túsirem.   Juldyzdar sapqa tizilip, Kútedi túnnen jańalyq. Ózine bizdi baýraıdy, Eki ortadaǵy aralyq.  

  Bir óleńim ishimde, Kórem ony túsimde. Tek aqıqat biledi, Ne mán baryn isimde.   Baǵytym bar, baǵymda, Arbalamyn saǵymǵa. Qarsy júzip kelemin, Ótkel bermes aǵymǵa.   Jaqyn tartsa ajalym, Kókke keter ǵazalym. Gúlge oranyp jatady, Kip-kishkentaı mazarym.   Shyr-pyr bolyp aqtalmaı, Ótirikten maqtanbaı. Bir-aq sátte ózińdi, Kórsetesiń aqtarmaı...   İshtegi óleń til qatar, Kózdiń jasyn qurǵatar. Keń dúnıeń taraıyp, Tar dúnıeń jyrǵatar.  

  Maýqymdy basar saǵynyshym bolshy, Qalasań kúnde baraıyn. Muńaıa qalsam, qýanyshym bolshy, Jar ǵylyp seni alaıyn.   Júregimdi órter shabytym bolshy, Dúnıeni jyrlap óteıin. Kelmeske ketsem, tabytym bolshy, Qushaqtap seni keteıin.   Qaıta oralmaıtyn jastyǵym bolshy, Esime ap kúnde kúleıin. Jana almaı jatsam, ottyǵym bolshy, Lapyldap, óshpeı júreıin.   Asqaqtap ketsem, aqylym bolshy, Sabama túsip oılanar. Bul ómirdegi jaqynym bolshy, Kóńilim sonda jaılanar.   Altynnan qundy jaqutym bolshy, Tek óziń ǵana tiregim. Bárinen buryn baqytym bolshy, Keýdemde soqqan júregim.