*****
Kúte-kúte saǵynǵanda jyrshy ulyn,
Kárilikke qoıypty aıtyp bir syryn.
Maýjyraıdy aspan tósep keýdesin
Jylýyna apam jaqqan shyrpynyń.
Jan jaryńdy tiriltýge qulshynyp,
Qara dóńnen myń tústiń be, myń shyǵyp?
Tóbedegi qabir emes, jeroshaq,
Erteń qaıta tutanatyn tirshilik...
Qaıysqanda, sirá, kári qabyrǵań,
Kim bar eken dál qasyńnan tabylǵan?!
Órken jaıyp keledi ómir aǵashy
Topyraqta jatqan sol bir tamyrdan...
Alys jaqqa eliktirip ot elik,
Muzda jattym dápterimdi tósenip.
Týǵan jerge tastap qaıtyp ketip em,
Jasyl tonym – jastyq shaqty kóterip!
Daýysymnan (oqyr bolsam jyrymdy,)
Tanısyń ba sonaý jylǵy qulyndy?!
Seniń erniń – kóbelegi Allanyń,
Mańdaıymnan soratyn bar muńymdy!
******
Esime túsire alman eshkimimdi,
Dańǵaza tiriligimniń óshti me úni?
Aq aıdynnan aqqý-qaz kóteriler,
Arqalap kótermekke keshki kúndi...
Jaıylsa júregime muń kilemi,
Perishte –Oı kelerin bildiredi.
Kókjıektiń kógiljim shárbatyna,
Jaqyndap kele jatyr túnniń erni...
Qıa alar jalǵyz kúnniń jaryǵyn kim,
Kózime shýaq quıyp taǵy kúldim.
Kózi toımas kóleńkem kólbep jatyr,
Orynyn ólshep qazylar qabirimnyń...
Kim bilsin oıatty ma qustyń úni ,
Aspanǵa pák rýhtyń shyqty biri...
Japyraq – jalǵan taǵy kútip jatyr,
Qysqa tún qonaq bolar shyq – ǵumyrdy...
Tolqyǵan áppaq aıdyn aq kóbikti
(Gúl ashty ...)
Jaǵadaǵy tasqa egipti ...
Bilmespiz tún bolmasa,
Kúlim kóz kún
Aspanǵa san myń tamshy jas tógipti....
******
Ári jat, sekildi ári tanys ólim,
Sen netken jaqyn ári alys ediń?!
Esil kún túsime ensin
Sharabyma
Týǵan jer topyraǵyn sap ishemin!
Jerinen ketkenderdiń bári muńly,
Tek topyraq basady saryǵymdy.
anam bergen aq shytqa túıip alyp,
Alyp júrmin ózimniń qabirimdi!
Taǵdyr meni týǵan jer – taqtan alyp,
Ertispen aǵyzdy ǵoı jatqan aǵyp.
Sen jyltasyń sergeldeń aqyn janyn,
Túnegen shaqtarynda baqqa baryp...
Týǵan jer topyraǵy,
Janymdy emde,
Terbeshi ánińmen de,
Mánińmen de.
Men seni sheńgelime qysyp jatam,
Ólgenimde qıa almaı Táńirgede!..
*****
Eńkeıer shybyq tabylǵan
Súımek bop jeriń ár tasyn.
Jatady taýlar aýyrǵan
Bastyryp bultqa arqasyn.
Jazady saǵym basqa eshkim
túsinbes jyryn astarlap.
Jaǵaǵa kelgen aq tolqyn
Kóterip qaıtar bas barmaq.
Aıasyna aına-bastaýdyń
Keterdeı syıyp ǵaryshyń.
Shyrmaýyq órler jas taldyń
Janynyń syıpap aǵysyn.
Artyqtaı mynaý alapta,
Barady adam jolda aǵyp.
Arqasyn súıep aǵashqa
Kóleńke otyr oılanyp...
MAQPAL TÚN MASTYǴY
Urany bolǵan emes ulylyqtyń,
Men ony kóp oılanyp búgin uqtym.
Kóshede turdym uzaq qys túnine
Demimmen jyryn jazyp jylylyqtyń.
Mastanam mańdaı terge qarap men de,
Sol bolar shattyq deıtin sharap keıde.
Janymnyń jańa jylyn uqtyrǵany-aı,
Án salyp júrek urǵan saǵat – keýde...
Túsinbes dep jaýlasyp janashyrmen,
Byldyrlap júrippin ǵoı bala tilmen.
Kórdim men Aı bop júzgen armanymdy,
Jarymnyń janaryndaı qara túnnen.
Kóp ótpeı kóktem keler osyny oılap,
Jatyr ǵoı kóńilimniń qusy toılap.
Sulý sý kesteleıdi keń ólkemdi
Taǵylǵan saýsaǵyna kópir – oımaq...
Pák dúnıe, sábıdeı bastyrylǵan
Jabyqpa!
Basym ketpes jastyǵyńnan.
Juldyzdyń nury sińgen aq qaryn jep,
Aıyǵam maqpal túnniń mastyǵynan...
