Oý, halaıyq! Arzan bop turǵanda jumyrtqa alyp qalaıyq! Shymkentte keshe ǵana on danasy - 320 teńgeden satylyp kelgen jumyrtqanyń baǵasy búgin – 220 teńge bop tur. Al, kelisi 350-450 teńgege jetken mandarın 280-300den, myń teńgelik qıar 550-700 teńgege saýdalanýda. Bul jóninde málimetti matritca.kz tilshisi habarlaıdy.

Ánsheıinde, «jabaıy» saýdadan aıaq alyp júre almaıtyn, «Qyrǵy bazardyń» aınalasy taǵy da tazaryp qalypty. Baǵa nege bulaısha kúrt tómendep ketti desem, kezekti reıd júrip jatyr eken...

Qurmetti oblys jáne qala basshylary! 

Sizderdi ne qyzmetkerlerińiz, ne saýdagerler ylǵı osylaı «aldaıdy». Álde, BAQ úshin jasalǵan, «kózboıaýshylyq» pa? Nede bolsa, úkimet basshysyna bir boıama esep ketti-aý! Bulaı deıtinim, osydan birli jarym aı buryn týra osyndaı kórinistiń kýási bolǵan em. «Bul neǵylǵan komýnızm» dep ketkenmin. Ol kezde qyzanaqtyń kelisi bir aptadaı 100-150 teńgege deıin tómendegen edi. 

Baǵany qoldan kótergen saýdagerlerge «aıyppul» salý kerek. Ásirese, jekemenshik dúken egeleri oıyna kelgen baǵany qoıyp júr. Jurt osy kúnde «pensıanyń» kóbeıgenine keııtin bolǵan. Sebebi, ınflásıa báribir qaltany qaǵady. Jalpy, benzınniń taýyq pen sıyrdyń «buttaryna» ne qatysy bar eken? Qazir bir «qoldyń» súti – bir jarym lıtr benzınnen de qymbat. 

Halyqty salyqqa «qaryq» qylǵysh úkimet, odan da aspandaǵan azyq baǵasyn aýyzdyqtaýǵa qulyqty bolsaıshy. 

Prezıdent aımaqtarǵa is-saparmen baratyn kezde, ákimdiktegiler belgilengen baǵyttyń bárin retke keltirip qoıady. Búginde joldarynyń toz-tozy shyqqan kóshelerdiń turǵyndary: «Elbasy bizdiń kóshemen de júrip ótse ǵoı» - dep ázildesetin bolǵan. Sol aıtpaqshy, Ońtústiktiń ákimi men Shym-shahardyń basshysy jıi-jıi bazarlatyp tursa eken degen tilek qoı, bizdiki.