Investısıalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov qazaqstandyqtarǵa arzan ıpoteka berýdiń amalyn aıtty, dep habarlaıdy kazinform.kz.

«Memleket ıpotekanyń qunyn azaıtý úshin jańadan salynǵan úılerden páter satyp alamyn degen kisilerge  10 paıyzben, al jeke úı salamyn degen azamattarǵa 5 paıyzben ıpoteka beredi. Bul ıpotekalar «Qazaqstan Ipotekalyq kompanıasy» AQ arqyly sýbsıdıalanady», - dedi Marhabat Jaıymbetov.

 Túsindire ketsek, «Qazaqstan Ipotekalyq kompanıasy» qazir elimizdegi ekinshi deńgeıli banktermen kelissóz júrgizip jatyr. Marhabat Jaıymbetovtiń aıtýynsha, olar (qurylys komıteti men «Qazaqstan ıpotekalyq kompanıasy - agenttik) ekinshi deńgeıli bankterdi 17 paıyzben ıpoteka berýge kóndirip jatyr. Buǵan kelisken bankterdiń bergen 17 paıyzdyq ıpotekasynyń 7 paıyzyn memleket sýbsıdıalaıdy da, azamatqa qalǵan 10 paıyzy qalady. Jeke turǵyn úı salamyn degen azamattarǵa da týra osy mehanızmnen ótý kerek. Jeke úı salamyn degen azamattar úshin budan da az paıyz, ıaǵnı, 5 paıyz kózdelgen.

«Osy ıpotekany sýbsıdıalaý úshin 10 mlrd teńge kózdelip otyr. Osyndaı sýbsıdıalaýdyń arqasynda 600 myń sharshy metr turǵyn úı salý josparlanyp otyr», - dedi Jaıymbetov. Bul jeńildikke Turǵyn úı qurylys jınaq bankiniń salymshylary ǵana ıe bola alady.