Sońǵy ýaqytta mınıstr Erlan Saǵadıev te, ol basqaratyn Bilim jáne ǵylym mınıstrligi de — aqparat quraldarynyń basty taqyrybyna aınalǵany jasyryn emes. Mınıstrdi jaqsy kóretin de, jek kóretin de, qoldaıtyn da, qarsy shyǵatyn da eń negizgi elektorat — mektep muǵalimderi. Ol túsinikti de, dep jazady "Qasym"-Aqparat" portaly.
Biraq mınıstr nelikten únemi susty bolyp kórinedi? Árıne, ol basqaratyn vedomstvo balabaqsha emes ekeni túsinikti. Degenmen de qandaı qaýyrt bolsa da, aýdıtorıa – bas ustazdyń rıasyz kúlkisin kórgisi keledi emes pe? Mınıstr jurtshylyqtan jarqyn kúlkisin nege jasyrady? Múmkin ol minezine baılanysty bolar? Bul suraqtarǵa jaýapty fızıognomıst-maman, psıholog Aıjan Tólendınadan surap kórgen edik. Oqyp kórińiz.
— Adamnyń minez-qulqyn bet-beınesinen oqý fızıognomıst-mamannyń jumysy. Iaǵnı, shıryqqan bulshyq etterinen bastap ernine deıin zer salsaq, adamnyń qandaı ekenin, qazir qandaı kóńil-kúıde júrgenin anyqtaýǵa bolady. Mınıstrdiń bet-júzi sur, susty bolyp kóringenimen — ony qatygez dep aıtýǵa kelmeıdi. Men qazir qolymda turǵan myna sýretke qarap, adamnyń (mınıstrdiń) qas ushtaryna, uzyndyǵyna, kóz ushy men formasyna qarap ol kisiniń — óte sezimtal, ýaıymshyl, temperamenti salmaqty ári konservatıvti adamǵa keletinin aıtqym keledi. Kóz — jannyń aınasy desek, ishki buryshtaryna zer salsaq, onyń (mınıstrdiń) óz prınsıpterine berik ekenin kórsetedi. Qastardyń bir bóligine jáne ósý baǵytyna qarap, bul adamdy agresıaǵa ıtermeleý óte qıyn ekenin aıtqym keledi.
Endi mınıstrdiń sóıleý mánerine, jáne «býyn bólshekteýin», ıaǵnı málimdeme jasamas buryn, pýblıkaǵa shyqpas buryn — tosynnan emes, tyńǵylyqty daıyndalatyn adamǵa uqsaıdy. Sóıleý kezinde S, K, J áripterin tyńdap kórińiz, temberde sekem bar. Demek, «mynany aıttym, keshegi oılastyryp otyrǵan ana málimetti aıtýǵa umytpaýym kerek» degendeı. Ol kisi óz prınsıpterine qansha berik bolsa da, keıbir ıdeıalary synǵa ushyrasa, argýmentterdi zerdelep shyǵyp, bas tartýy múmkin. Kózdiń «ashylyp-jabylý» jıiligine qarap, konflıkt týdyratyn adamǵa uqsamaıdy. Sóılegen kezde «daýys tolqynyn» tyńdap kórińiz 0,004 dB-den aspaıdy. Demek, bul kisi óz qol astyndaǵy adamdarǵa daýys kótermeıdi. Tipti qyzmetkeri bir nárseni 3 ret surasa da, ashýlanbaı, jaýap berýden bas tartýy múmkin, biraq daýys kótermeıdi.
Endi nege kúlmeıdi degen suraqqa kelsek — onyń ártúrli sebepteri bolýy múmkin. Men onyń barlyǵyn tarqatyp, taratyp aıtqym kelmeıdi. Mınıstr degen aty bolmasa, ol da adam. Biraq, mysaly úshin menen aıyrmashylyǵy — ol únemi obektıv nazarynda. Onyń kóńil-kúıi — qoǵamnyń da kóńil-kúıine áser etetini jasyryn emes. Sondyqtan, sol taraptan da nazar aýdarǵan durys bolar edi. Meniń oıymsha, mınıstrdiń ımıjmeıkerleri óte álsiz. Tipti olar bolmaýy múmkin.
Mine, mınıstr mekteptiń ashylýyna qatysyp otyr — jymıǵany bolmasa, qýanyshyn jasyryp tur.
Mine, mınıstr, kórmeni aralap otyr — oqýshyǵa osylaı qarasa, árıne, ana shákirt aıtar sózin umytyp qalmaǵanda, qaıda barady.
Álbette, mınıstr sırktiń dırektory emes, kúnde eldi máz-meıram qylatyn, túsinemiz. Biraq ol júzdegen rektorǵa rektor, myńdaǵan dırektorǵa dırektor, mıllıondaǵan oqýshy úshin bas ustaz ekenin esten shyǵarmaýy tıis.
Sondyqtan ımıjdiń keı tustaryna da kóńil bólgen durys bolar edi. Imıj degen kıim emes, túr-álpet. Baıaǵyda myna kitap nege esimde qaldy, nege oqyǵym keldi — óıtkeni muqabadaǵy Kenjeǵalı Saǵadıev senim uıalatyp turdy. Tipti sońǵy ret Prezıdentpen kezdesken kezde de kúlkisinen tamasha energetıka esip turdy.
Bilim mınıstriniń de qolynan kelmeıdi emes. Qazaqstan óz mınıstriniń myna beınesin kúnde bolmasa da, jıi kórgisi keledi.
