Reseı prezıdenti Vladımır Pýtın jumadaǵy búkilreseılik «Selıger-2014» jastar forýmy kezinde Máskeýdiń ıadrolyq arsenaldarǵa ıe áskerı kúshteri syrttan keletin kez-kelgen shabýyldarǵa saqadaı saı turǵandyǵyn málimdep, «Shet memleketterdiń bizdi mazalamaǵandary eń durys talǵam»,- dep Eýropa men AQSH-qa ses kórsetkendeı boldy dep habarlaıdy Reıter agenttigi. Reıter agenttiginiń aıtýynsha, Reseı qarýly kúshteriniń Ýkraına terıtorıasyna kópe-kórneý basyp kirýinen keıin NATO, Eýroodaq elderi jáne AQSH taraptyń qatal málimdemeler jasaýyna tuspa-tus kelgen Vladımır Pýtınniń bul sózderi halyqaralyq úlken qaýiptiń tónip kele jatqandyǵyn ańǵartady.  Olardyń paıymdaýynsha, ıadrolyq soǵys qaýpi tónip keledi.

«Reseı iri kólemdi qaıshylyqtardan qashyq. Biz ondaıdy qalap ta, josparlap ta otyrmyz joq. Alaıda, biz, árıne, Reseıge tóngen kez-kelgen agresıaǵa jaýap qaıtarýǵa daıynbyz»,- degen Reseı prezıdenti forýmda. « Qudaıǵa shúkir, Eshkim de Reseımen iri kólemdi qaıshylyqqa barǵysy kelmeıdi. Reseıdiń álemdegi ozyq ıadrolyq kúshterge ıe el ekendigin esterińizge salǵym keledi»,- dep sur svıter men jasyl djınsy kıgen Reseı basshysynyń stýdentterge jaýap bergenin aıtady atalmysh Aǵylshyn aqparat kózi. 

«Vladımır Pýtın osylaı ses kórsetip jatqanda, Eýropa men AQSH tarapy Máskeýge endigári jumsaqtyq istemeýge tıis ekendikterin ashyq aıtýda»,- deıdi Reuters. Keshendi qarýlanǵan Reseıdiń 1000 áskeri men júzdegen tankteri Ýkraına terıtorıasyna basyp kirgendigin habarlaǵan NATO jaǵy da Máskeýge qatal jaýap qaıtarý kerek ekendigin aıtýda. Brıtanıa premeri Devıd Kemeron Máskeý kúshterin shegindirip áketpese, « saldarynyń» qıyn bolatynyn aıtyp otyr. Ýkraına jaǵdaıyna qatysty qatty alańdaýshylyǵyn bildirgen ol bul zańsyz áreketti jedel toqtatý kerektigin aıtady. Keler aptada Ýelsta ótetin NATO-nyń samıtynda óziniń odaqtastarymen osy másele tóńireginde sheshim qabyldaıtynyn málimdegen. Al, AQSH prezıdenti Barak Obama jumadaǵy Aq úıde aıtqan sózinde Vladımır Pýtınge qarata endi Reseıge kórshi Baltyq elderine qysym jasamaýdy eskertken. Keler aptada Ýelstaǵy NATO lıderleriniń kezdesýine daıyndalyp jatqan Barak Obama Estonıa, Latvıa jáne Lıtva elderimen Reseıdiń Ýkraınaǵa shapqynshylyǵyna qarsy odaqtastyǵyn nyǵaıta túsetinin, odaqqa múshe eldiń bireýine qaýip tóngen jaǵdaıda, NATO-ǵa múshe elderdiń de beker qarap jatpaıtyndyǵy týraly kelisimderin tipti de pysyqtaı túsetindigin jetkizgen.

Al, Kıev osy jolǵy shuǵyl jaǵdaı týraly Eýroodaq elderinen «zor kólemdi» áskerı qoldaý surap otyr.

***              ***                 ***

Sońǵy aqparattarǵa negizdelgende, senbide Eýroodaq elderi Ýkraınaǵa Reseı qarýly kúshteriniń kirýine baılanysty Máskeýge bir aptalyq últımatým jarıalaǵandyǵyn málimdep otyr. Eýroodaq lıderleri Máskeýge bir apta ishinde « Ýkraınadaǵy áskerı kúshterin jedel shegindirip áketýin» eskertti. Eýroodaq prezıdenti Herman Van Rompeı 28 eldiń lıderleriniń Brússeldegi kezdesýinde, Reseıge « tipti de aýyr qadamdarǵa» barýǵa keliskenderin jarıa etti. Al,  AQSH senatory Robert Menendes prezıdent Barak Obamanyń Ýkraınaǵa kómek berýdi uıymdastyratyn ýaqyty jetti dep otyr. «Biz Ýkraınaǵa ózderin qorǵaý úshin soǵysýyna múmkindik berýimiz kerek»,- degen AQSH senatory CNN bergen suqpatynda.

Daıyndaǵan: Sanat Naqqazaq.