Qazaqtyń tanymal boksshysy Qanat Islam Taldyqorǵan qalasyna arnaıy kelip, jankúıerlerimen júzdesti, dep habarlaıdy «Qamshy» portaly.

Basqosýǵa kelgen jurttyń sanynda esep joq. Ár aımaqtan aǵylyp jatty. Aqsaqaldar oǵan bata berip, Jetisý jurtshylyǵy at mingizip shapan japty.

«Meni osylaı qurmettep, ystyq lebizderińizdi bildirip jatqandaryńyzǵa alǵysym sheksiz. Adam bolǵan soń álsiz jerlerimiz de bar, biraq namysty qoldan bermeýge kúsh salamyn. Alda kóptegen saıystar kútýde, buıyrsa, sol jarystarda qazaqtyń kók týyn jelbirete berýge tyrysamyn», - dedi belgili boksshy.

Aıta keteıik, Qanat Islam kásipqoı rıngte 23 kezdesý ótkizip, bárinde jeńiske jetti. Sońǵy jekpe-jegi 18 aqpanda ótti. Brazılıalyq Robson Assıspen jekpe-jekke shyǵyp, birinshi raýndta-aq nokaýtpen jeńgen edi.