Elbasy memleket júrgizip jatqan demografıalyq saıasattyń aspektilerine toqtalyp, ana men balaǵa qoldaý kórsetý jáne olardy qorǵaý máselelerine nazar aýdardy.

– Bıyl meniń tapsyrmammen 2030 jylǵa deıingi otbasylyq jáne genderlik saıasat tujyrymdamasy iske asyryla bastaıdy. Shilde aıynda bala týýǵa baılanysty tólenetin járdemaqy kólemi 20 paıyzǵa ósedi. Jyl saıyn ana men balaǵa qarastyrylǵan qarjylyq qoldaý shyǵyndary 160 mıllıard teńge bolyp otyr. Oǵan qosa ata-analarǵa 120 mıllıard teńge Memlekettik áleýmettik saqtandyrý qory esebinen tólenip keledi. Sońǵy on jylda biz ana ólimin 3,7 esege, bala ólimin bir jarym esege deıin tómendetýge qol jetkizdik, – dedi Memleket basshysy.

Budan bólek, Nursultan Nazarbaev elimizdegi genderlik saıasatty nyǵaıtýǵa baǵyttalǵan birqatar mindetti aıqyndap berdi. Onyń ishinde otbasy ınstıtýtyn nyǵaıtý basty mindettiń biri bolyp sanalady.

Bul oraıda Elbasy Qazaqstanda erli-zaıyptylardyń jaýapkershilik arqalaýǵa daıyn bolmaýynyń saldarynan nekege turǵan  árbir úshinshi juptyń ajyrasyp jatqany jóninde málimet keltirdi.

– Qazir elimizde ata-ananyń tek bireýiniń ǵana asyraýyndaǵy tolyq emes jarty mıllıon otbasy bar. Bul máseleni sheshý jóninde sharalar qabyldaý qajet, – dedi Qazaqstan Prezıdenti.

Sonymen birge, Memleket basshysy balalarǵa qatysty kez-kelgen zorlyq-zombylyqty joıyp, óskeleń urpaq tárbıesin arnaýly úıirmeler men mekemelerde patrıottyq sezimdi kúsheıtý arqyly qamtamasyz etý qajettigine nazar aýdardy.

– Tórt jylda bir ret olımpıada jeńimpazdary jetekshilik etetin  Búkilqazaqstandyq balalar olımpıadasyn ótkizý múmkindigin qarastyrýǵa bolady. Taǵy bir másele – áıelderdiń ortasha kiris deńgeıi erkektermen salystyrǵanda áli kúnge deıin úshten bir mólsherge tómen. Mundaı jaǵdaıdyń oryn alýynyń basty sebebiniń biri – Úkimet bekitken Áıelder eńbegin qoldanýǵa tyıym salynǵan jumystar tizimi, – dedi Nursultan Nazarbaev.

Elbasy genderlik saıasattyń basymdyǵy bar bir baǵyty retinde analar men balalar úshin qolaıly orta qalyptastyrý, sondaı-aq anaǵa degen syılastyq mádenıetin jandandyrý qajettigin aıtyp ótti.

– Bálkim, balalar úshin jalpyulttyq ashyq esik kúnderin ótkizip otyrý kerek bolar. Qurmetti hanymdar, sizderdiń qoldaýlaryńyzben biz barlyq josparymyzdy iske asyra alamyz dep úmittenemin, – dedi Qazaqstan Prezıdenti.

Memleket basshysy qazirgi saıası jańǵyrý úderisi barysynda áıelderdiń zor ról atqaratynyna senim bildirdi.

Kezdesýge qatysýshylar ózderiniń kásibı jáne kúndelikti ómirindegi jetistikteri jóninde áńgimeledi.

Memleket basshysy is-shara sońynda kóp balaly ana O.Muqashevany «Altyn alqa» belgisimen marapattap, kezdesýge qatysýshylar úshin «Aqorda» rezıdensıasy ishinde ekskýrsıa júrgizdi.

Kezdesýge Memlekettik hatshy, Prezıdent janyndaǵy Áıelder isteri jáne otbasylyq-demografıalyq saıasat jónindegi ulttyq komısıa tóraıymy G.Ábdiqalyqova, Prezıdent Ákimshiliginiń basshysy Á.Jaqsybekov, Parlament Májilisiniń depýtaty, Bala quqyqtary jónindegi ýákil Z.Balıeva, Ulttyq ekonomıka vıse-mınıstri M.Ábilqasymova, mıkrobıolog-ǵalym Á.Ernazarova, bıatlonnan «Almaty-2017» ýnıversıadasynyń jeńimpazy A.Shevchenko, aýyldyq orta mektep dırektory I.Sedova, «Jas Atameken» jas kásipkerler klýbynyń prezıdenti Z.Kókjanova, aqyn T.Qabylsha, T.Júrgenov atyndaǵy Qazaq Ulttyq óner akademıasynyń magıstranty M.Galıskaıa, «Teńizshevroıl» jaýapkershiligi shekteýli seriktestigi Adam resýrstary basqarmasynyń bas menedjeri Sh.Altybaeva, aýdandyq aýrýhananyń bas dárigeri Q.Razıeva, «Astana-Balet» teatrynyń jetekshi balerınasy M.Býkanova, kóp balaly ana O.Muqasheva, qobyzdan halyqaralyq baıqaýlardyń jeńimpazy A.Tájibaeva, kámeletke tolmaǵandar isi jónindegi mamandandyrylǵan aýdanaralyq sot tóraǵasy N.Razzaq, Abaı atyndaǵy Qazaq memlekettik akademıalyq opera jáne balet teatrynyń ánshisi O.Davydenko, Qazaqstan Respýblıkasy Qarýly Kúshteriniń Parashútpen sekirýge daıyndaý ortalyǵynyń aǵa mamany R.Ramazanova, ártis S.Baqaeva, jýrnalıs V.Mırlanqyzy qatysty.