25-nshi qyrkúıek kúni Almatyda Eýrazıalyq odaqqa kirý máselesinde jalpyhalyqtyq referendým ótkizý jónindegi bastamashyl top jıyn uıymdastyrdy.Oǵan  opozısıa ókilderi, úkimettik emes uıymdar, zıaly qaýym men saıasattanýshy, ekonomıs sarapshylar qatysty. Tómende sol jıynǵa qatysýshylardyń málimdemesin usynyp otyrmyz.

 Bizder birneshe aıdan beri Táýelsiz memleketterdiń qarym-qatynasynda buryn-sońdy bolmaǵan jaǵdaıdy baıqap otyrmyz. Reseı prezıdenti V.Pýtın óziniń nókerlerine quramyna Reseı, Qazaqstan jáne Belorýs kiretin Evrazıalyq Odaq (EO) qurý jónindegi jumystardy shıratyp, sol Odaqtyń alǵashqy basqarýshy organy -  Evrazıalyq Parlamentti jasaqtaýdy jedeldetýge nusqaý berýin jıiletti. Al oǵan bizdiń joǵarǵy bıliktegi laýazymdy adamdar selt etip ún qatar emes, tipti 1994 jyly Evrazıalyq Odaq qurý ıdeıasyn birinshi bolyp kótergen, kúni keshege deıin sol ıdeıasyn tyqpalap kelgen prezıdent N.Nazarbaevtyń ózi de lám-mım deýge dármensiz qalypta.

Máskeý Evrazıalyq Odaqqa kirgen memleketterdiń táýelsiz saıası ókilettikteriniń biraz bóligi ulttyq ınstıtýttardan joǵary turǵan ortaq qurylymdarǵa berilýi tıis ekendigin tipti jasyrmaıdy da. Qazirgi kezdegi Reseı basshylyǵy ustanǵan saıasattaǵy negizgi baǵyttardyń biri - ulyderjavalyq  dástúrlerin qaıta jańǵyrtyp, jerlerdi jınastyrý,  Reseıge  álemdik sasatta yqpalyn júrgizetin burynǵy mártebesin qaıtaryp alý ekendigi ámbege aıan. Kreml   bul maqsattaryna jetý úshin tutastaı áskerı jáne ekonomıkalyq sharalardy iske qosýǵa, ozbyrlyq, basqynshylyq jáne arandatýshylyq saıasatyn iske asyrýǵa qabyletti ekendikterin áldeneshe ret tanytqan.

Reseı Federasıasynyń ekonomıkasy qazaqstandikinen 10 ese, al halqynyń sany 9 ese artyq. Osyny kóldeneń tartqan reseılikter Eýrazıalyq Ekonomıkalyq komısıanyń 80 paıyzyn qurap otyr.  Eýrazıalyq Odaqtyń  aqshasyn basatyn stanokty da Reseıdiń ózinde qaldyrary tipti anyq nárse.

Osynyń bárinen shyǵatyn qorytyndy bireý: Qazaqstannyń Eýrazıalyq Odaqqa múshe bolýynyń aqyry bizdiń elimizdi óz tarıhyndaǵy qaıǵyly kezeńge uryndyrady - memlekettik táýelsizdigimizdi joǵaltýǵa alyp barady!

Biz memleketimizdi búgingi kúni jarǵa ıterip jatqan Qazaqstan men Reseı basshylarynyń ashyq nemese astyrtyn jasaǵan áreketterine, olardyń jeń ushynan jalǵasqan kelisimderine qarsy ekendigimizdi málimdeımiz!

Biz elimizdiń taǵdyry sheshiletin sátte Qazaqstan halqynyń  sheshim qabyldaýdan múlde shettetilgeni bylaı tursyn, tipti, bolyp jatqan oqıǵalarǵa qatysty aıqyn aqparat alýdyń ornyna, jalǵandyqqa tap bolatynyna kúıinemiz!

Biz Eýrazıalyq Odaq qurý bastamashylarynyń birikken Eýropanyń tájirıbesin tilge tıek etip, ony orynsyz kóldeneń tartýlaryna úzildi-kesildi qarsymyz. Eýroodaqqa  ózara senimmen birikken,  sheshim qabyldaýdyń jáne qarama-qaıshylyqty retteýdiń qalyptasqan, ashyq júıeleri bar,  mańyzdy barlyq máseler boıynsha jalpyhalyqtyq referendýmdy udaıy ótkizetin demokratıalyq memleketter múshe bolyp kirgen.

Elimizdiń budan arǵy taǵdyryna alańdaýshylyq bildirip,biz azamattardyń Qazaqstannyń Eýrazıalyq Odaqqa qatyspaýy týraly máseleni jalpyhalyqtyq referendýmǵa shyǵarý jónindegi bastamalaryn  qoldaımyz!

Másele memlekettiń Táýelsizdigine baılanysty bolǵandyqtan biz prezıdent N.Nazarbaevtan memleket basshysy jáne Konstıtýsıa kepili retinde saıası ıntegrasıaǵa qatysty, Eýrazıalyq Odaq pen Eýrazıalyq parlamentti qurý jaǵdaıy týraly tolyq esep berýin talap etemiz. Prezıdent  Qazaqstannyń memleketimizdiń Táýelsizdigine qater tóndiretindeı qandaı da bir qadamǵa barmaıtynyna aıqyn kepildik berýi qajet. Biz elimizdiń zańdaryna Qazaqstan Respýblıkasynyń táýelsiz saıası ókilettiliginiń kez kelgen bóligin bárinen joǵary turatyn áldebir ulttyq saıası qurylymdarǵa berýge tıym salatyn baptar engizilýi tıis dep esepteımiz!

Sondaı-aq, memleket basshysy Kedendik odaqqa kirgennen bergi alǵashqy nátıjeler týraly, onyń ishinde - ústimizdegi jyldyń birinshi jarty jyldyǵynda otandyq taýardy eksporttaýdyń 30 paıyzǵa tómendeýiniń, KO-qa múshelikke baılanysty ishki baǵanyń ósip ketýiniń  sebepteri týraly da esep berýi qajet. Biz ekonomıkalyq ázirligi joq Qazaqstannyń Kedendik Odaqqa odan ári qatysýynyń máselesi keńinen qoǵamdyq talqyǵa túsýi tıis dep esepteımiz.

Biz Qazaqstan bıliginiń qolynda, terezesi teń emes halyqaralyq jaqyndasýlarǵa áýestenbeı - aq, El azamattarynyń laıyqty tirshiligin qamtamasyz ete alatyn, zamanaýı ekonomıkany jáne básekege qabiletti memleketti qalyptastyratyn tıimdi de senimdi tetikter jetkilikti degen senimdemiz! Qazaqstannyń qazba baılyǵy  men shetelderge shyǵarylǵan mıllıardtaǵan dollar qarjyny halyqqa qaıtarý, demokratıalyq reformalardy júzege asyrý, bılikti  baqylaýda ustaý jáne jaýapty etý qajet!

Qazaqstannyń Táýelsizdigi - bul bizdiń eshqashan qunsyzdanbaıtyn baılyǵymyz!

Bul bizdiń tirshiligimizdiń tamyry, árbir qazaqstandyqtyń jany men júreginiń qýaty!

Qazaqstannyń Táýelsizdigi - ata-babalarymyzdyń san urpaǵynyń iske asyrylǵan asqaq armany, ony áldebir saıasatshylardyń qoljaýlyǵyna aınaldyra almaımyz!

25 qyrkúıek 2012 jyl

Almaty qalasy