Oıan, qazaq! Oılan, qazaq! Bol, qazaq! 
Shyn baqytqa jetkizetin jol da uzaq. 
Alashaǵyń az ba myna dúnıeden, 
Bolashaǵyń emes pe edi zor, ǵajap?! 

Oıan, qazaq! Oılan, qazaq! Bol, qazaq! 
Silkinshi bir qanatyńdy qomdap ap! 
Aýyryńdy arqala da, alǵa bas, 
Baýyryńmen ne kórindi jorǵalap?! 

Men qazaqpyn, sen qazaqsyń, ol qazaq, 
Er minezben ór rýhqa bolma jat. 
Ortasyna jalǵyz orys kirgende, 
Orys tilde shúldirleıdi on qazaq. 

Atalardan qalǵan asyl muramyz – 
Týǵan jerdiń qaq tórinde turamyz. 
Azattyǵy umytylǵan ult bolyp, 
«Qazaq tili» qoǵamdaryn quramyz. 

Qurǵap ketken quldyq sińgen sanamyz, 
Sumdyq sińgen súıekke de – Qarańyz! 
Toılanady merekemiz jat jurtsha, 
Oılanady ózge tilde balamyz. 

Qurandy da, Qudaıdy da súımeımiz. 
Sulý kórsek ,ońashaǵa súıreımiz. 
Jyrtań-jyrtań, qaljyń aıtyp kúlemiz, 
Tyrtań-tyrtań, toıǵa kelsek, bıleımiz. 

Bireý ozsa – kúńkil-kúńkil kúndeımiz, 
Bireý tozsa – dúrkin-dúrkin júndeımiz. 
«Namys!» degen sózdi jıi aıtamyz, 
Biraq onyń ne ekenin bilmeımiz. 

Dúnıeniń paıdasyna pysyqpyz. 
Jánnat ıisin seze almaıtyn pushyqpyz. 
Baýyrlarǵa arystanbyz, baryspyz, 
Basqalarǵa bas ıgende – mysyqpyz. 

Maqtanshaqpyz, ótirikshi, dańǵoımyz, 
Tútindeımiz, úrlese de janbaımyz. 
«Jer betinde bizden uly ult joq!» dep, 
Ózimizdi-ózimiz kóp aldaımyz. 

İsimiz joq eske alatyn tamsanyp, 
Selteńdeımiz áýeıi bop án salyp. 
Tiri aǵaıyn páter tappaı júrgende, 
Ólgenderge áýremiz tam salyp. 

«Qanym taza, janym taza» degenmen, 
Kósh sońynda qalyp qoıdyq nege elden? 
Moıyndaǵan kúlli adamzat nemiz bar? 
Ne shyǵardyq el yntyqqan, elengen? 

Búkil álem órkendeýde dúrildep, 
Ǵaryshty da ıgerýde buryn kep. 
Keme de emes, ushaq ta emes, bizderde 
Belesebet jasaı alar bilim joq. 

Shirengende úzeńgini územiz. 
Múıizdimiz múıizsizdi súzemiz. 
Oralmanǵa odyraıa qaraımyz, 
Kelimsekten dirildeıdi tizemiz. 

Ertegige esigin keń ashqanyń, 
Erteńine qatyrmaıdy bastaryn. 
Qonaǵy bı jaman úıdiń turǵyny, 
Shetterinen shel basqan kóz, mesqaryn. 
Qudaı bergen munaı, kómir, mysyń da, 
Bizdiki emes, bıliginde basqanyń. 

Syrt kózge syr bermegenmen taırańdap, 
Aqylymyz ashyp bitti aıran bop. 
Qamqor Alla saqtamasa bizderdi, 
Qaıran jurtta ózin qorǵar qaıran joq. 
Oıan, qazaq! Oılan, qazaq!…