Elimizge belgili jýrnalıs, telejúrgizýshi Bıbigúl Dáýletbekqyzy jýyq arada "Men ánshimin" baıqaýyn otandyq telearnalardan kórsetilýine qatysty óz pikirini Facebook áleýmettik jelisindegi paraqshasynda jarıalapty, dep habarlaıdy "Qamshy".
"Dımashtyń Qytaıda ótip jatqan "Men ánshimin" jobasyn "Habardan" kórsetedi dep, súıinshiletip boldyńyzdar ma? Já, meniń de aıtarym bar, endeshe...
Qudaıym-aý, bul "Habardyń" qaı sasqany? Tóreligin aıtyńyzdarshy ózderińiz?!
Sonda bárimiz endigi barlyǵyn ıterip qoıyp, qytaılardyń shoýyn kóremiz be? Qytaılar bul jobany árıne tegin berip qoımaıdy otandyq arnaǵa? Sonda mıllıondaǵan qarajatqa ótip ketken jobany satyp almaq pa? Bul joba jaqyn kúnderi aıaqtalady. Túk túsinbedim.
Dımashty áleýmettik jelide qoldaýshy jýrnalıserdiń biri ózimmin. Jeńip shyqsyn dep ár apta saıyn Qudaıdan tilep otyramyn (oǵan ózderińiz de kýásizder). Alaıda, bul jobanyń otandyq arnada kórsetilýine úzildi-kesildi qarsymyn! Ne deseńizder, o deńizder...Iá, men qarsymyn!
Bul joba arqyly biz Qytaıdy nasıhattaımyz. Kezinde Reseı men Ýkraınanyń shoýlaryn kórsetip álek bolyp edi elimizdegi arnalar, endi qalmaǵany Qytaıdyń jobasy...
Dımashtyń 8 kezeńin, Youtube aman bolsyn, sol jerden kórip qoıdyq qoı. Eger "Habar" sonshalyqty Dımashty qoldaǵysy kelse, mıllıondaǵan qarajatqa dál osyndaı mega-joba ashsyn! O nesi, barlyǵy súıinshiletip Qytaıdyń ótip ketken jobasy otandyq arnadan kórsetedi dep shýlap.
Oılanyńyzdar, áriptester, oılanyńyzdar! Bul joba arqyly biz Qytaıǵa esigimizdi ashamyz. Onsyz da qazaq qyzdary Qytaıdyń jigitterine kúıeýge tıip, bala týyp jatqanynda bul joba olarǵa tıimdi bolmaq. Telearna arqyly olardy nasıhattaımyz. Qalaısha osyny túsinbeıdi? Sonda qytaı ánshileriniń qıqýlatqan ánin bir saǵat boıy bizdiń Qazaq halqy kórý kerek pe? Qaı memleketti kórdińizder ózge eldiń osyndaı shoýdy satyp alyp jatqanyn?! UIAT!!! MASQARA!!!
Qýansaq, Qazaq balasynyń sol jobada synaqtan ótip, daýysyn álem tyńdaǵanyna qýandyq. Boıaýshy, boıaýshy degenge bizdiń arnalar osy saqalyn boıap bara jatqan joq pa? Paradoks...
Sondyqtan da, óz basym qarsymyn!" - deıdi Bıbigúl Dáýletbekqyzy.
Esterińizge sala ketsek, Qytaı elinde ótip jatqan "Men ánshimin" jobasyna jalpy jurtqa tanymal ánshi Dımash Qudaıbergenov qatysyp, aqtyq máre, ıaǵnı fınalǵa joldama alǵan bolatyn. Dımashtyń ónerin qazaq halqy tek ınternet arqyly tamashalap júrdi. Endigi kezekte sol jobany "Habar" arnasynan kórsetedi degen aqparat tarap, oǵan qatysty áleýmettik jeli qoldanýshylary óz pikirlerin bildirip jatyr.
