«Ár qazaq meniń jalǵyzym» - dep aqyn Sadyr Adaı aıtqandaı, bul kúnderi álemniń 50-ge jýyq elderinde qazaqtar ómir súredi. Sonyń ishinde óziniń ulttyq qundylyqtaryn kóziniń qarashyǵyndaı saqtap, ádet-ǵuryp, salt-dástúrin joımaı kelgen, az bolsa da kópke úlgi bolǵan ór rýhty – Mońǵolıa qazaqtary.

Mońǵolıa qazaqtarynyń basym bóligi shoǵyrlanǵan Baıan-Ólgeı aımaǵynda qazir 100 myńnan astam qandastarymyz ómir súredi. Qazaqı ádet-ǵurypy men dástúrin saqtaǵan baıan-ólgeılikter árqashan bizdiń maqtanyshymyz. Ulttyq mereke Naýryz meıramyn da qandastarymyz saltanatty túrde toılaıdy. Bıylǵy Ulystyń uly kúni naýryz meıramyna oraı Baıan-Ólgeı aımaǵynyń ortalyq alańynda 1000 dombyrashy búldirshin qatar turyp kúı tartqany týraly beınebaıandy qandas baýyrymyz zertteýshi, jýrnalıs Shynarbek Seıithanuly óziniń (Seytkhan Shinarbek) ǵalamtor paraqshasyna jarıalaǵan bolatyn.

«Naǵyz qazaq qazaq emes, naǵyz qazaq dombyra» degendeıin 1000 búldirshinniń qatar turyp, birdeı kúı tartqany tarıhı oqıǵa bolýymen qatar, kúlli qazaqtyń rýhyn kóterip, ınternet jelilerinde qyzý talqyǵa túsip, qandas baýyrymyz jarıalaǵan beınebaıandy 1 kúnniń ishinde 30 myńnan astam adam kórip úlgerdi. Ulttyq salt-dástúrin ulyqtap júrgen qandas baýyrlarǵa alǵys bildiremiz.

Qazaqtyń qara dombyrasynyń shanaǵynan tógilgen kúıler ár shańyraqta kóptep estilsin!