«Úıirimdi tulpardaı kisinep tabam», - dep turýy kerek búkil esti edam! Men bılikke, Qudaı bar, qarsy emespin, Qarsy bop tur, qaıteıin, Úkimet maǵan!
Qazaqqa baqyt tiledim, tilesem Haqtan, El muńyn ǵana kúnine jyr etem batpan! Aıybym meniń qandastar kelsin degenim ǵana, Aýytqyp kórgen jerim joq Nurekeń jaqtan!
Qumalaq salshy dep, senseńiz, baqsyǵa da aıttym, Ózim qurmet tutatyn, jalynyp, jaqsyǵa da aıttym. Shettegi qazaq kelsin degen de Nurekeń sózi, Men ony aıtsam, ózgeden qattyraq aıttym!
Kóbeıe bastap ek endi, kún ysyp shamaly, Úmitim jelge, týystar, shyn ushyp barady. Qazaq kelsin shettegi desem, Úkimet, Keltirmeýge qasaryp, tyrysyp baǵady!
Úkimet degen Alpamys emes pe alyp deneli, Qutqarmaı ma teńizge ketken baryp kemeni. Kelsem degen qazaqty Alataýyma, Aıamaı kúnde tobyqtan qaǵyp keledi.
Bolmaı-aq qoısyn, ókpe joq, má dep bereri, Kelgen el ózi baılyq pen sán ap keledi! Kelsem degen qazaqtyń Atajurtyma, Tosqaýyl qoıyp aldyna álektenedi!..
Keledi tynbaı kógimde qyransha-aq ushqym, Bermeıdi saǵan qazaqtaı shyn án sap eshkim! Men aıtarymdy aıamaı aıtyp kelemin, Tynar eken túbi nemen bul arpalysyń?!!
Aýyt Muqıbek
11.09.2014 Astana
