Meniń jolym – keshegi babam joly, Opyryp ketken kópirin zaman qoly. Arandarǵa jem boldy halqym meniń, Borandarǵa tap boldy dalam doly!
Meniń jolym – uzaq jol, jeńis joly, Bar baǵyty baqytqa tegis toly. Kele jatqan jerinen shyńǵa tartyp, Buryp ketti bireýler eńiske ony!
Meniń jolym – sara jol, arman joly, Tımeı júrip shabys pen zardan qoly – Bastap kelip babalar bir beleske, Tabystaǵan taǵy bir Tarlanǵa ony...
Atajurttan ózgeni jersinbegen, Bota bozdap, atalar eńkildegen. Meniń jolym Uly jol, bile-bilseń, «Qazaq túgel shettegi kelsin!» degen!
Aralasam eldermen tym iriktep, Jeteleıdi aldyǵa bir úmit tek. Búgin maǵan kóp, bilem, tis basýly, Búgin maǵan túıýli judyryq kóp.
Sańǵyp ushsa, shydaıyn qus basymnan, Adaspaıdy qashanda myqty aqyldan. Shyǵarǵandar jumystan shyǵara bersin, Qalsam, qala turaıyn tustasymnan!
Jerdiń dushpan ejelden ıenine ósh, Aǵylady ereń-aq túıeli kósh! Kún keshemiz jabyqpaı, jaltaqtamaı, Eshkimge de jatpaısyz súıenip esh.
Basqalardan shyǵady daýsyń da óktem, Bastaısyń bir sezine narqyńdy eppen. Dúnıege qaraısyń basqa kózben, Basylyp qalǵan serpilip, halqym, kópten...
Qazaq degen qasqaıyp tursa qalqan, Baqyt ánin atpaı ma shyrqap ár tań! Elim sonda, kóresiń, bórkin atyp, Bir jyryma ataıdy bir Samarhan!
09.09.2014 Astana
