Jemqorlyqty jurt aldynda jazǵyrý sybaılas jemqorlyqqa qarsy negizgi qaǵıdattar bolýy tıis. Bul týraly Astanada «Qazaqstan-2050» demokratıalyq kúshterdiń jalpyulttyq koalısıasynyń otyrysynda «Nur Otan» partıasy Tóraǵasynyń birinshi orynbasary Baýyrjan Baıbek málimdegen.

«Qyzmet kórsetý salasynda ákimshilik kedergiler, sýbektıvti faktorlar barynsha azaıtylý ústinde. Iaǵnı, qarapaıym jurtshylyq qajetti qujattarǵa «jalǵyz tereze» júıesimen qysqa ýaqyttyń ishinde qol jetkizýde. Anyqtamalardyń birqatary «elektrondy úkimet» arqyly adamı faktorsyz berilýde. Sonymen qatar tólemderdiń keıbiri elektrondy túrde atqarylýda. Memlekettik organdar tarapynan beriletin ruqsattar sany qysqartylýda. Elbasynyń tapsyrmasymen ol elý paıyzǵa deıin azaıtylatyn boldy», - degen B.Baıbek.

QazAqparattyń jazýynsha, sonymen qatar Baýyrjan Baıbek sybaılas jemqorlyq qylmysyna barǵandar sheni men shekpenine, laýazymyna qaramastan jazalanyp jatqandyǵyn atap ótken.

Eske sala keteıik, 2014 jyldyń shildesinde «Nur Otan» partıasy Sybaılas jemqorlyqqa qarsy is-qımyl baǵdarlamasynyń jobasyn ázirlep, qalyń buqaranyń talqylaýyna usynǵan bolatyn. Belgili bolǵandaı, baǵdarlama jobasy 6 myńnan astam alańda talqylanyp, oǵan 800 myńnan astam qazaqstandyq qatysypty. Barlyǵy 800-den astam usynystar men tolyqtyrýlar túsken Sybaılas jemqorlyqqa qarsy partıalyq baǵdarlama bıylǵy kúzde Saıası keńestiń otyrysynda qabyldanbaq eken.

Qamshy-aqparat