«Aıqyn» gazeti múshel jasyna oraı «13 jyldyqqa – on úsh shara» atty bastama kótergen bolatyn. Basylym ujymy bul joly jas jýrnalısermen ádettegiden ózgeshe jaǵdaıda, dastarhan basynda dıdarlasty. Sondaı-aq, aıqyndyqtar tarapynan tórt stýdentke bir rettik shákirtaqy taǵaıyndaldy.
Ál-Farabı atyndaǵy QazUÝ-dyń jýrnalısıka fakúltetine at basyn tiregen «Aıqyn» gazetiniń Nurtóre Júsip bastaǵan ujymy kezdesýdi qazaqy naqyshta ótkizdi. Ulttyq kıim kıip qana qoımaı, ulttyq taǵamdardan dám tatyrdy. Buryn esimderin gazet betinen, maqala sońynan ǵana kórip júrgen jýrnalısermen júzbe-júz jolyqqan stýdentter erekshe áser aldy.
Saǵatbek MEDEÝBEKULY, jýrnalısıka fakúltetiniń dekany:
– «Qazaq múshel jasyna ulan-asyr toı jasaıdy. Osy ata-dástúrdi jańǵyrtyp júrgen «Aıqyn» gazetiniń ujymyna alǵys aıtqymyz keledi. Elimizdegi qazaq tilinde jaryq kóretin respýblıkalyq basylymdardyń kóshin bastaıtyn gazetterdiń biregeıi desek, artyq emes. Óıtkeni munda qyzmet etetin jýrnalıser basym kópshiligi Qazaqstanǵa belgili tilshiler. Aptasyna tórt márte gazet shyǵarý – ońaı sharýa emes. Qıyndyǵy men qyzyǵy qatar júretin qaınaǵan orta dep osyny aıtsa kerek. Bizdiń stýdenttermen tildesip, aqyl-keńesterińizdi jıi aıtyp otyrsańyzdar eken. Osy ádemi úrdisti endi elimizdiń ózge de BAQ ókilderi izin sýytpaı, jalǵasa jaqsy bolar edi. Bıylǵy mereıtoılarymen quttyqtaı otyryp, ujymǵa shyǵarmashylyq tabys tilegimiz keledi. «Aıqyndy» alyp, aıqyndalaıyq!
Jýrnalısıkaǵa degen talaby zor tórt stýdentke bir rettik shákirtaqy taǵaıyndaldy. Onyń birin gazetimizdiń qyzmetkeri Aıdana Nurmuhan anasynyń qurmetine óz atynan tabys etti.
Nurtóre JÚSİP, «Aıqyn» gazetiniń bas redaktory:
–Qara shańyraq – QazUÝ-dyń jýrfagy kópshiligimizge ystyq. Óıtkeni ujymdaǵy jýrnalıserdiń basym bóligi osy oqý ordasynan tálim alǵan. Men de osy jerdiń túlegimin ári bir jyldary oqytýshylyq qyzmette bolǵan edim. Jas jýrnalıserdi daıyndaıtyn birden-bir oryn ekenin jyldar boıy dáleldep keledi. «13 jyldyqqa – on úsh shara» aıasynda bul jerdi umyt qaldyrýǵa bolmaıdy. Jyly qabyldap, qonaq retinde kútip alǵan fakúltet ujymyna alǵys aıtqymyz keledi. Elimizge belgili jýrnalıserdi tárbıelep, oqý ornynyń bedeli arta bersin.
Esterińizge sala ketsek, osyǵan deıin gazet ujymy jýrnalıser arasynda shahmattan Aikyn Media Open týrnırin ótkizip, Almatydaǵy Qazaqstan Injenerlik-tehnologıalyq ýnıversıteti stýdentterimen kezdesken bolatyn. Aıqyndyqtardyń tórtinshi sharasy aldaǵy ýaqytta belgili bolady.
Jadyra AQQAIYR
