Keshe, 15 qyrkúıek Respýblıkalyq jemqorlyqqa qarsy is-qımyl qoǵamdyq keńesiniń (RJQİQK) otyrysynda «Jas Otan» jastar qanatynyń atqarýshy hatshysy Nurlan Sydyqov osylaı dep málimdedi.
Onyń aıtýynsha, «Nur Otan» partıasynyń «STOP Qylmys» jobasynyń aıasynda jasotandyqtar jyl ortasyna qaraı Astana men Almaty qalalary jáne elimizdiń barlyq oblystarynda «Taza sesıa» aksıasyn ótkizgen.
«Saýalnama barysynda alynǵan málimetter negizinde JOO-daǵy qandaı da bir qyzmetterdiń baǵasyn anyqtadyq. Mysaly, 12 000 teńgege bir JOO-da bir pándi ǵana jabý múmkin bolsa, ekinshisinde barlyq sesıany jaba alady ekensiz. Iaǵnı, elimiz boıynsha sesıany jabý quny orta eseppen 29 000 teńgeni quraıdy. Al bir pándi jabý 5000 teńge», - dedi ol.
«Buǵan qarap, biz, jastar JOO-ǵa bilim alý úshin emes, jaı ǵana dıplom alý úshin baratyndaı áserde qalamyz. Bári aqshamen sheshiletin bolsa, onyń nesi bilim dep saýal tastaýymyz zańdy bolsa kerek. Tipten, kýrstyq jumystardyń ózi 13 000 teńge eken. Eń arzandary 2000-3000 teńgeni quraıdy», - dep atap ótti Nurlan Sydyqov.
Sondaı-aq, ol, 60 000 teńgege dıplom jumysyn satyp alýǵa bolatynyn aıta kele, olardyń da ortasha qunynyń aǵymdaǵy ýaqytta 30 000 teńgeni quraıtynyna toqtaldy.
Aıta keteıik, a.j. 26 mamyr men 10 maýsym aralyǵynda «Jas Otan» jastar qanatynyń kúsh salýymen 62 JOO-ny qamtyǵan anonımdi saýalnama júrgizildi. Bul aksıa oqý ordalaryndaǵy jemqorlyq faktilerin áshkerleýge baǵyttaldy.
