Elimizde eń tómengi ómir súrý deńgeıi - 17 myń 439 teńgege jetti. Daǵdarys jaılap, qymbatshylyq sharyqtaǵan ýaqytta bul qarjyǵa bir aı qalaı ómir súrýge bolady?

"Mardymsyz aqshaǵa azyq-túlik te kelmeıdi" dep dabyl qaqqan qoǵam ókilderi, jańa Úkimetke óz talaptaryn qoıyp otyr. Olardyń aıtýynsha, "bul kórsetkish kem degende 3 ese artyq bolýy tıis". Serik Ahmetov Úkimet basyna kele salysymen, "osy jyly ortasha jalaqy 11,7 paıyzǵa ósip, 98 myń teńgege jetti" degeni bar. Alaıda, qazirgi eń tómengi ómir súrý kórsetkishi ár azamatqa shaqqanda 17 myń 439 teńgeden kelgendikten, qoǵam ókilderiniń Úkimet basshysyna degen aıtar nazy basqa. QR Parlament Májilisiniń depýtaty Jambyl Ahmetbekov "Shyqpa janym shyqpamen" otyrýǵa bolady. Sý iship, shaı almaı, nan alyp, et jemeı. Onda 17 myń teńge jetip qalatyn shyǵar", - deıdi. Ótken jyly prezıdenttike úmitker atanǵan Jambyl Ahmetbekov, sol kezde eń tómengi kúnkóris deńgeıi 200 myń teńgeni quraýy tıis dep, kópshiliktiń kókeıindegisin dóp basqany edi. Áli de osy baılamyn berik ustanǵan ol, "Eýropada halyq qansha tutynady, sony tolyq esepteıdi. Biz quzyrly mınstrlikke saýal jiberdik, tek qarastyryp jatyrmyz degen jaýap qana keledi" deıdi.

"Aman-saýlyq" qoǵamdyq qorynyń prezıdenti Baqyt Túmenova da bizdegi eń tómengi ómir súrý kórsetkishine kún kórý múmkin emes degen pikirde. Onyń oıynsha, bul kórsetkishti eń keminde úsh esege arttyrý qajet.

Ol damyǵan elderde kúnkóris deńgeıi kórsetkishiniń 30 paıyzy azyq-túlikke, qalǵany ózge qajettilikterge jumsalatynyn alǵa tartady. "Bizdiń elimizde 60 paıyzdy quraıdy. Bul durys emes" deıdi qoǵamdyq qor ókili. Endi sanap kórelik. Halyqtyń kúndelikti tutynatyn azyq-túliginiń biri nannyń ortasha baǵasy - 60, sút - 225, maı - 140 teńge turady. Barlyǵy 425 teńgeni quraıdy. Ony 30 kúnge kóbeıtsek, 12750 teńgege jetedi. Al, komýnaldyq tólem men ózge de qajettilikterdi aıtpaǵannyń ózinde, adamnyń únemi ańsary aýyp turatyn jemis-jıdekti túsińizde kóresiz. Úkimet belgilegen mejemen áleýmettiń turmys deńgeıi sáıkes kelmese, qazirgi bılikke úlken syn deıdi qoǵam ókilderi.