Bir eldi sý, bir eldi qar basýda.
Basqynshylyq basqa elde jalǵasýda.
Qara kózden qandy jas quıylyp kep,
Tolyqsıdy ózender arnasynda.

Gúldep turǵan baqtardy úsik shaldy.
Týylǵaly turǵan tól túsip qaldy.
Orman, taýlar kenetten otqa oranyp,
Qasha almaǵan qanshama ań pisip qaldy!

Pisip qaldy balyq ta teńizdegi.
Dinsizdikten búlingen negizderi,
Toǵyz jasar qyzdaryn topqa salyp,
Eń jeksuryn tabysty el izdedi.

Shyryldasa jón aıtyp shyn asyl er,
Tyńdamaıdy sózdiń eń rasyn el.
Jeti aǵaıyn jut kezse jerdiń betin, 
Sonyń bári adamnyń kúnásinen.

Tótenshe bul jaǵdaıdy patsha kórip,
Qazynadan jónelter aqsha bólip.
Ol aqshaǵa «Qudaıdyń bergeni!» dep,
Jeter nebir jemqorlar atsha jelip.

Alarmandar antalap alasurǵan.
Ala kózi qantalap janatyndar.
«Buryn kelgen molyraq qarmaıdy» dep,
Búlingennen búldirgi alatyndar.

Qar kóshkini... birese qurǵaqshylyq.
Qurymasaq keler-aý bir jaqsylyq!
Aıatynan Allanyń adamdarǵa
Áýmeserdiń áni tur qymbat shyǵyp.

Dańǵaza men daqpyrttan qulaq tunyp,
Dańqqumarlar dalbaqtap júr aptyǵyp.
Keshegi jan berýge daıyn dostar,
Ketýde birin-biri laqtyryp.

Teńdesi joq jasardaı sumdyq erlik,
Júz gramdy juttyq ta jyndy boldyq.
Sodan bolar shegirtke, burshaq túgil,
Órmekshiler jaýǵan bir kúndi kórdik.

Aldaý-arbaý aınalań, para, jala...
Peıilinde pendeniń qara jara.
Jumsaqtyqtan júrekter jurdaı bolyp,
Tasqa aınalyp keledi bara-bara.

Jylylyqqa shaqyrǵan sózden jerip,
Oń-teristi, qanekeı, bezbender jurt?
Emis-emis qulaqpen estigendi,
Oqtyn-oqtyn qalamyz kózben kórip.

Azǵyndaǵan rýhy el júdedi.
Erkekke erkek emeksip eljiredi...
Qaraǵaı basyn shortan shalǵandaıyn,
Kórindi aqyrzaman belgileri.

Jańalyqtar jańǵyryp jahanǵa jat,
Úlkenin sabaıdy jas saqaldan ap.
Atyń óshkir «qyzteke» degenderdi
Kórip pe eken buryndar atam qazaq?

Shekten shyqqan shirikti kim tyıa alar?
Aıtý turmaq tyńdaýǵa jurt uıalar,
Ólip qana qalmastan júr-aý nebir
Óz jynysyn ózgertken surqıalar.

Jańylǵan soń shahadat kálımańnan,
Jamandyqqa aınalar pánı jalǵan.
Shyryldatyp qyz emes,
Shyrqyratyp
Sánge aınala bastady sábı zorlaý.

Qudaıdan qoryqpaǵan kisi - nadan.
Shaıtanǵa ileskenniń isi - jaman.
Qanshama qaýym ketti typ-tıpyl bop,
Allanyń qarǵysyna ushyraǵan?!

Jalyn sharpyp ótse de jalańdaǵan,
Daýyl jaıpap ótse de dalańdaǵan,
Taýdaı-taýdaı tolqyndar týlap kelip,
Jaǵadaǵy el jaǵdaıy jaman bolǵan.

Qaharlanyp qara jer silkingende,
Qalalar qırap qalǵan zaman bolǵan.
Jermen-jeksen bolsa da jer dúnıe,
Quran menen meshitter aman qalǵan!

Aýyr apat jetse de, joıqyn qaıǵy,
Baıqamaıdy kópshilik aıqyn jaıdy.
Qansha shyǵyn bolǵany habarlanyp,
Nege olaı bolǵany aıtylmaıdy.

Aıtpaıdy ony. Al bireý aıta almaıdy.
Jer anamyz bekerge shaıqalmaıdy.
Kúnálardan tyıyl da, kómek sura,
Alla eshqashan tilekti qaıtarmaıdy!