Qyzdar ýnıversıtetiniń stýdenttik «Jan saraıy» teatry ónersúıer qaýym nazaryna «Qara shekpen» atty qoıylymdy usyndy dep habarlaıdy "Qamshy"aqparattyq agenttigi.

Spektákl osetıalyq dramatýrg Georgıı Hýgaevtyń «Qara shekpen» pesasy negizinde sahnalandy. Qoıylymdy jas rejıserlar Daýlet Arıpov pen Merhat Jonýsov qoıdy. Qoıylymnyń uzaqtyǵy – 1 saǵat. Aıta keteıik, stýdenttik «Jan saraıy» teatrynyń akterleri oqý orynnyń «Óner jáne mádenıet» fakúlteti «Mádenı-tynyǵý jumysy» mamandyǵynyń 1-2 kýrs stýdentterinen quralǵan.  

G.Hýgaevtyń atalmysh pesasy kóptegen elderdiń sahnasynda qoıylǵan.  Ertegi retinde de, áfsana retinde de usynylǵan. Shyǵarmanyń keıipkerleri jabaıy ań-qus pen úı janýarlary. Týyndynyń basty maqsaty – jan-janýarlardyń beıneleri arqyly adam boıyndaǵy ártúrli kemshilikterdi kórsetý, oı salý, adamnyń shynaıy bet perdesin ashyp kórsetý. «Qara shekpen» – mahabbat pen dostyq, adaldyq pen satqyndyq toǵysqan fılosofıalyq áfsana. Spektákl ómirdiń aq pen qarasyn, adaldyq pen aramdyqty, jaqsylyq pen jamandyqtyń bitispes kúresin qoıylymnyń basty keıipkerler: Tuzar-ıt, Kókjal-qasqyr, Qanshyq, Danyshpan-qarǵa, Qosúreı-qoıan, Sylań-túlki, atshabar-SHıbóri,  úı janýarlary esek, teke, qoılar men qozy arqyly  kórermenge jetkize bilgen. Adam keıpin haıýan arqyly satıralyq túrde jasyrý - ezoptyq ádisti qoldanyp, búgingi túlkideı qubylǵan zamannyń ashshy shyndyǵyn túrli obrazdar arqyly jetkizgen. Mysaly, Qarǵa arqaly baısaldylyqty, qasqyr arqyly zulymdyq pen aılany, Tóbet arqyly senimdilik pen adaldyqty, Esek-qyrsyqtyqty, túlki arqyly qýlyq pen ekijúzdilikti, teke arqyly bılikqumarlylyq syndy adam boıyndaǵy qasıetterdi kórsete bilgen.

«Rólderdi oınaýshylar stýdentter bolsa da, akterlar oıyny joǵary deńgeıde usynylyp, ózindik ereksheligimen kórermenderdi baýraı aldy. Eń bastysy kórermenge jetkendigi. Bizge de, zalda otyrǵan barsha kórermenge áser etti. Rejıserdiń aıtatyn oıy ashyldy. Meniń ózime qoıan, qarǵa, shıbórini somdaǵan akterlerdiń róli kóńilimnen shyqty. Negizinen, bul qoıylymnyń aıtar oıy tereń. Qazirgi zamanda ózekti taqyryptardyń biri. «Jan saraıy» teatryna tek sáttilik tileımin. Repertýarlary tárbıelik máni zor qoıylymdarǵa toly bolsyn!», dedi qoıylymnan keıingi áserimen bólisken T.Júrgenov atyndaǵy óner kolejiniń, «Akter sheberligi» mamandyǵynyń oqytýshysy, akter Aıdos Áýesbaev.

Adamı qasıetter men qundylyqtardy alǵa tartqan qoıylymnyń jastarǵa  aıtary kóp, oı salatyn, ıdeıasy tereń, tárbıelik máni zor zamanaýı spektal. Osyndaı qundy dúnıeni usynyp otyrǵan jas daryndardan quralǵan teatr ujymynyń qashanda óz kórermeni bolatyny sózsiz.