Nursultan Nazarbaev Qyrǵyz Respýblıkasyna sapary aıasynda Joǵary Eýrazıalyq ekonomıkalyq keńestiń shaǵyn jáne keńeıtilgen quramdaǵy otyrystaryna qatysty, dep habarlaıdy Qamshy aqparattyq agenttigi Aqorda baspasóz qyzmetine silteme jasap.

Sondaı-aq, Keńes jumysyna Armenıa, Belarýs, Qyrǵyzstan, Reseı prezıdentteri – Serj Sargsán, Aleksandr Lýkashenko, Almazbek Atambaev, Vladımır Pýtın jáne Eýrazıalyq ekonomıkalyq komısıa alqasynyń tóraǵasy Tıgran Sarkısán qatysty.

Shaǵyn qurammen ótken otyrysta Eýrazıalyq ekonomıkalyq odaqtyń (EAEO) 2015-2016 jyldardaǵy halyqaralyq qyzmetiniń negizgi baǵyttarynyń iske asyrylýy týraly baıandama tyńdaldy.

Otyrys barysynda taraptar Odaq aıasyndaǵy ekonomıkalyq ózara is-qımyldyń ózekti jaıttaryn, halyqaralyq yntymaqtastyq pen Eýrazıa keńistigindegi odan ári ıntegrasıalaný máselelerin talqylady.

Memleket basshysy Keńestiń keńeıtilgen quramdaǵy otyrysynda osydan úsh jyl buryn Astanada qol qoıylǵan Eýrazıalyq ekonomıkalyq odaq týraly sharttyń oryndalýyna baılanysty negizgi tustarǵa toqtaldy, bul jıynǵa  Moldova Prezıdenti I.Dodon da qatysty.

– Uıymnyń sharttyq-quqyqtyq bazasy jasalyp, onyń aıasy júıeli túrde keńeıip keledi, uzaqmerzimdi jáne ortamerzimdi basymdyqtary da aıqyndaldy. Taýardyń, qyzmet kórsetýdiń, kapıtal men jumys kúshiniń erkin qozǵalysy naqty júzege asýda. Biz ekonomıka salasynda bir-birimizben kelise jumys júrgizip, ekonomıkanyń mańyzdy degen bólikterinde úılesimdi saıasat ustanyp otyrmyz. Ártúrli eldermen jáne halyqaralyq uıymdarmen baılanys ornyǵyp keledi, – dedi Qazaqstan Prezıdenti.

Nursultan Nazarbaev qalyptasý kezeńinde Eýrazıalyq ekonomıkalyq odaqtyń jahandyq ekonomıkadaǵy daǵdarystyq qubylystardy jáne kúrdeli geosaıası jaǵdaı qaterlerin eńsere bilgenin atap ótti.

– Osynyń barlyǵy uıymymyzdyń sońǵy ýaqytta aıtarlyqtaı tómendep ketken kórsetkishterine áserin tıgizdi. Alaıda daǵdarys máńgilik emes, quldyraýdyń sońy ósimge ulasatyny belgili, – dedi Memleket basshysy.

Qazaqstan Prezıdenti Odaqqa qatysýshy elderdiń kópshiligi byltyr kúrdeli jaǵdaıǵa qaramastan, ekonomıkalyq kórsetkishter ósimine qol jetkizgenin atap ótti.  

– 2017 jyldyń basyndaǵy statısıkalyq málimetter kóńilge úmit uıalatady. Osy jyldyń alǵashqy aılarynyń nátıjesi boıynsha, EAEO-nyń syrtqy saýda kólemi 37%-ǵa ulǵaıdy, al ózara saýda– 38%-ǵa ósti, – dedi Nursultan Nazarbaev.

Sondaı-aq, Memleket basshysy atalǵan oń úrdisti ornyqtyrý qajettigin aıta kelip, osy baǵyttaǵy basty qadamdardy atap kórsetti.

– Birinshiden, EAEO-ny damytýǵa kedergi keltiretin barlyq shekteýlerdi joıý qajet. Ekinshiden, taýardy ótkizetin naryqtardy keńeıtip, ınvestısıa ósimi úshin halyqaralyq áriptestermen jańa saýda-ekonomıkalyq kelisimder jasalýyn qamtamasyz etý kerek. Úshinshiden, elderimizdiń ekonomıkasy úshin osyndaı kúrdeli kezeńde ózara kómek qolyn sozǵan jón. Tórtinshiden, daǵdarystyq qubylystardy eńserýge Daǵdarysqa qarsy kúres keńesi jaqsy járdemshi bola alady, – dedi Qazaqstan Prezıdenti.

Nursultan Nazarbaev Ekonomıka jáne qarjy mınıstrleri keńesiniń, sondaı-aq EAEO elderiniń ortalyq bankteri jetekshileriniń quramyn jasaqtaý jónindegi Qazaqstannyń usynystaryn erekshe atap ótti.    

– Keńes uıymǵa múshe memleketterdiń qarjy-ekonomıkalyq saıasatynyń máseleleri jáne daǵdarystyq qubylystardyń aldyn alý úshin ózara kelisilgen sharalar qabyldaý jóninde EAEO organdaryna usynymdar beredi. Onyń jumysy ekonomıkalyq ósim men qarjy turaqtylyǵyn qamtamasyz etý úshin birlesken is-sharalardy iske asyrýǵa baǵyttalady. Keńestiń jumysy G-20-nyń janyndaǵy Qarjy turaqtylyǵy jónindegi keńestiń jáne Eýropalyq komısıa janyndaǵy EKOFIN-niń qyzmetine uqsas bolady, – dedi Memleket basshysy.

Taraptar Odaqtyń baqylaýshysy mártebesin berý máselesin de qarastyrdy, úshinshi elderde oǵan zor múddelilik bar.

Keńeıtilgen qurammen ótken otyrysta EAEO elderiniń 2017-2018 jyldarǵa arnalǵan makroekonomıkalyq saıasatynyń negizgi baǵdary bekitildi. Qujatta makroekonomıkalyq ahýaldy jaqsartý, korporatıvtik sektordy ınvestısıa kólemin arttyrýǵa yntalandyrý, shıkizattyq emes eksportty ilgeriletý baǵytyndaǵy eleýli sharalar kózdelgen.     

Sonymen qatar, otyrys qorytyndysynda EAEO men oǵan múshe memleketter jáne Iran arasynda erkin saýda aımaǵyn qurý jónindegi ýaqytsha kelisim týraly qujat qabyldandy.

Budan bólek, memleketter basshylary Eýrazıalyq ekonomıkalyq odaq janynan baqylaýshy memleket mártebesiniń berilýi týraly Moldova Respýblıkasynyń ótinishin qarastyrdy.

Sońynda Qazaqstan Prezıdenti Qyrǵyz tarapyna EAEO organdaryndaǵy tóraǵalyq qyzmeti barysynda tabysty jumys júrgizýine tilektestik bildirdi. 

Kezdesýge Armenıa, Belarýs, Qyrǵyzstan, Reseı, Tájikstan prezıdentteri – Serj Sargsán, Aleksandr Lýkashenko, Almazbek Atambaev, Vladımr Pýtın, Emomalı Rahmon, sondaı-aq UQSHU-nyń bas hatshysy mindetin atqarýshy Valerıı Semırıkov qatysty.

Beıresmı kezdesý barysynda UQSHU-ǵa múshe memleketter basshylary uıymdy odan ary damytý jáne qaýipsizdikti qamtamasyz etý salasyndaǵy yntymaqtastyqty nyǵaıtý máselelerin talqylady.  

Nursultan Nazarbaev Ujymdyq qaýipsizdik shart uıymyna qatysýshy elder úshin bıyl mereıtoılyq jyl ekenin atap ótti.  

Osyǵan oraı Qazaqstan Prezıdenti kezdesýge qatysýshylardy Shartqa qol qoıylǵanyna 25 jyl tolýymen quttyqtap, onyń ulttyq jáne óńirlik qaýipsizdikti qamtamasyz etýdegi, sondaı-aq uıymǵa múshe memleketterdiń tutastyǵyn nyǵaıtýdaǵy mańyzdylyǵyn erekshe atap ótti.

Sonymen birge, Memleket basshysy UQSHU-nyń qaýipsizdik salasyndaǵy basqa da halyqaralyq ınstıtýttarmen jáne uıymdarmen ózara is-qımylynyń aıasyn keńeıtý máselesine qatysýshylar nazaryn aýdardy.

Budan bólek, uıym músheleri qazirgi zamanǵy óńirlik jáne jahandyq qaterlermen kúres jolynda kúsh jumyldyrý múmkindikterin qarastyrdy.

Kezdesý sońynda uıymǵa múshe memleketterdiń basshylary Iýrıı Grıgorevıch Hachatýrovty UQSHU-nyń bas hatshysy etip taǵaıyndady.   

Esterińizge sala ketsek, búgin tańerteń Elbasy Nursultan Nazarbaev Bishkek qalasyna resmı saparmen barǵandyǵy jaıly málimdegen bolatynbyz.