Batys Qazaqstan oblysynyń polıseıleri Zelenov aýdany Shalǵaı aýyly ákiminiń 22 jastaǵy júrgizýshisiniń ólimine qatysty qylmystyq isti toqtatty. Tergeýshiler ákim júrgizýshisiniń óliminde qylmys quramy joq dep esepteıdi, - dep habarlaıdy Qamshy aqparat agenttigi tengrinews.kz-ke silteme berip . Eske sala keteıik, Vıktordyń máıiti byltyr 2 jeltoqsanda óz úıinen tabylǵan edi. Onyń qylqynyp ólgeni habarlanyp otyr. Sol kúni ol jumysqa shyqpaǵan eken. Vıktor Iakovenkonyń denesin onyń úıine kelgen baýyry kórgen. Kórshiler qaza tapqan jigittiń óz úıinde oryndyqqa baılaýly tabylǵanyn aıtqan edi. "Onyń tipti ish kıimi de áıeldiki bolǵan. Al aýzynda áıeldiń shulyǵy bolǵan. Ony óltirgender shulyqty jas jigittiń aýzyna tyqqany sonsha, onyń alyp shyǵý múmkin bolmaǵan", - degen málimet berilen bolatyn.

"Barlyq aıǵaq jigittiń zorlyqpen óltirilgenin kórsetken edi. Alaıda polıseıler osy qylmysqa qatysty málimet aıtýǵa asyqpady. Jýrnalıser tergeýdiń qalaı júrgizilip jatqanyn surastyryp turatyn. Al tártip saqshylary bolsa "qylmysqa qatysy bar degen kúdiktilerdi taba almaı jatyrmyz" dep jaýap bergen. Al tórt aıdan keıin olar tipti bul isti jaı jaba salýdy sheshken", - dep jazady basylym. "Qyzyq jaǵdaı bolyp tur: denesinde zorlyq belgileri bolǵan adam ólimi, biraq onda qylmys quramy joq. Sonda jigit óz-ózin baılap, ózin óltirgen bolyp tur ma?

Alaıda İİD ókilderi ony óz-ózine qol jumsaǵan dep te aıtpaıdy", - deıdi basylymdaǵylar. Al prokýratýra ókilderi polıseılerdiń sheshiminiń qanshalyqty zańdy ekenin tekserýge ýáde berdi. Adam quqyqtary jónindegi halyqaralyq búronyń oblystyq fılıalynda bul sheshimdi zańsyz dep atady. "Menińshe, bul zańsyz úkim, prokýratýra sheshimdi joıýy kerek. Munda eki nusqa bar: múmkin, polıseıler bul ispen aınalysqysy kelmeıdi nemese olardyń bul qylmysty ashýǵa múmkindik bermeıtin qandaı da bir sebepteri bar", - dedi fılıaldyń dırektory Pavel Kochetkov.