Máskeýde Mahmýd Velıtov esimdi moldany adam jerleý rásiminde aıtqan sózi úshin sottap jatyr, dep habarlaıdy Qamshy aqparattyq agenttigi Lenta.ru basylymyna silteme jasaı otyryp.

Máskeý qalasynyń aımaqtyq áskerı sotynda Iadrám meshitiniń ımamy Mahmýd Velıtovqa qatysty sot isi bastaldy. 2013 jyly onyń Reseıde tyıym salynǵan «Hızb ýt-Tahrır al-Islamı» uıymy múshesiniń jerleý rásiminde oqyǵan sózi terorızmdi aqtaý esebinde qaralyp otyr. Imam bolsa, qaıtys bolǵan adamnyń bul uıymǵa qatysy bar ekendigin bilmegenin aıtyp, óziniń kinásizdigin dáleldemekshi.

Tergeý isine sáıkes, ımam 2013 jyly meshitte oqylǵan janaza namazy aldynda sóılegen sózinde «Daǵystan azamaty Abdýlla Gappaevtyń dinı kózqarasyn oń baǵalaǵandyǵy» úshin aıyptalady. Gappaev tyıym salynǵan uıymnyń múshesi bolǵan. Ony 2013 jyldyń qyrkúıek aıynda Mahachkalada belgisiz jaǵdaıda óltirip ketken.

Velıtovtyń qorǵaýshysynyń aıtýynsha, ony qaıtys bolǵan adamǵa quran baǵyshtaǵany úshin aıyptaýda. Qorǵaýshynyń pikirinshe, ımam qaıtys bolǵan adam týraly tek jaqsy sóz aıtýy kerek. Jáne onyń aǵymyna qaramastan basyna quran baǵyshtaý ımamnyń mindeti. «Imamǵa musylman adam kelip, «baýyrymyz qaıtys boldy» dep habar beredi. Ol «Paıǵambar úmbetiniń jaqsy bir perzenti qaıtys boldy» dep, oǵan quran baǵyshtaıdy. Al tergeý sol sózi úshin ony «Hızb ýt-Tahrır al-Islamı» uıymyn jaqtap sóz sóıledi» dep aıyptaıdy. Onyń sózderiniń ishinde bul uıym týraly múldem aıtylǵan emes», - deıdi Velıtovtyń qorǵaýshysy Dagır Hasatov.

Onyń pikirinshe, ımamdardyń osylaı aıyptalýy «memlekettiń dinı ustanymdar erkindigine jasap otyrǵan qysymy».

Aıta keterlik jaqdaı Reseıde ımamdardy sotqa tartý jıilep barady. Osyǵan deıin Qorǵan qalasynda jergilikti meshittiń burynǵy ımamy Alı Iakýbovty «Vkontakte» jelisindegi paraqshasynda Qytaıdaǵy hıdjab kıýge tyıym salynǵan zań týraly jazǵan pikiri úshin aıyptalǵan bolatyn.

Daǵystandyq meshit ımamy Magomednabı Magomedovty jergilikti salafıtterdiń bastaýshysy dep aıyptap, bes jylǵa bas bostaǵandyǵynan aıyrǵan.

Ekaterınbýrgtegi «Rahmet» musylman qaýymdastyǵynyń ımamy Amır Mýzafarovty meshitte ekstremıstik ádebıet saqtady degen aıyppen bes jylǵa bas bostandyǵynan aıyrǵan. Onyń kómekshisi Albert Baıazıtovty 360 saǵattyq qoǵamdyq jumys jasaýǵa bekitken.

Belgorodtaǵy meshittiń ımamy Faızýlla Ismaılovty sýyq qarý men jarylǵysh zattardy saqtady degen aıyppen úsh jyl bas bostandyǵynan aıyrǵan. Sotta ımam  ózine bul zattardy quqyq qorǵaý organynyń qyzmetkerleri tastap ketti dep aqtalǵan. Jáne onyń qorǵaýshysy bul zattardan Ismaılovtyń saýsaq izderiniń tabylmaǵandyǵyn aıtyp shaǵymdanǵan.