14-sáýir kúni «Áziret Sultan» memlekettik tarıhı-mádenı qoryq-mýzeıiniń kitaphana bólmesiniń oqyrmandar zalynda «EKSPO-2017 kórmesi eldiktiń eren jemisi» atty kórmeniń ashylýy bolyp ótti dep habarlaıdy Qamshy aqparattyq agenttigi. Kórme elimizde 2017 jyly Halyqaralyq mamandandyrylǵan EKSPO-2017 kórmesiniń ótkiziletindigine jáne osy kórmeni nasıhattaý, tanytý maqsatynda uıymdastyryldy.

Kórmeniń ashylýyna «Áziret Sultan» memlekettik tarıhı-mádenı qoryq-mýzeıi qyzmetkerlerimen birge, mýzeıge eren eńbegi sińgen Saıan Qojamuratov, Jaına Ilıasova syndy ardagerlerimiz qatysyp óz oılaryn ortaǵa saldy. 

«Áziret Sultan» memlekettik tarıhı-mádenı qoryq-mýzeıinde jyldar boıy qyzmet etip, eńbeginiń zeınetin kórgen S.Qojamuratov EKSPO-2017 kórmesin ótkizýdiń bizdiń Táýelsiz jas memleketimiz úshin mańyzdylyǵyn aıtyp, barlyq qyzmetkerlerge sáttilik pen bıik belesterge jetýge shyǵarmashylyq tabystar tiledi.

Kelesi kezekte qoryq-murajaıdyń ǵylymı qyzmetkeri A.Orynbekova álemniń 100-den astam eli, halyqaralyq uıymdar men ınovasıalyq kompanıalary qatysatyn «Bolashaq energıasy» EKSPO-2017 kórmesiniń tarıhy, maqsaty, atqarylǵan jumystary men jetken jetistikteri jaıly qysqasha málimet berdi.

Kórme ekspozısıasynda EKSPO-2017 tarıhy jaıly syr shertetin biregeı fotosýretter, baspasóz betterine basylǵan maqalalar, murajaıymyzdyń baspa ónimderi kópshilik nazaryna usynyldy.