Sh.Aımanov atyndaǵy «Qazaqfılm» kınostýdıasy Mádenıet jáne sport mınıstrliginiń tapsyrysy boıynsha Dýlat Isabekovtiń senarıi negizinde Balýan Sholaq týraly tolyqmetrajdy kórkem fılm túsirmek.
Kınosenarıı M.Áýezov atyndaǵy qazaq memlekettik akademıalyq drama teatrynda sahnalanǵan «Jaýjúrek» pesasynyń jelisi boıynsha jazylǵan, dep habarlaıdy Qamshy aqparattyq agenttigi Qazaqfılmniń baspasóz qyzmetine silteme jasaı otyryp.
Qazirgi tańda túsirilim toby tolyqtaı jasaqtalǵan. Daıyndyq kezeńinde turǵan túsirilim fılmge qajetti kıimderdi tigip, rekvızıtter ázirlep, dekorasıalar túrǵyzyp jatyr. Fılmniń túsirilimderi Almaty jáne Soltústik Qazaqstan oblystarynda ótedi. Al rejıseri - Nurgeldi Sadyǵulov».
Fılmge qatysty Nurgeldi Sadyǵulov bylaı deıdi: «Men Balýan Sholaq tulǵasyna 1998 jyly T.Júrgenov atyndaǵy óner akademıasynda oqyp júrgenimde qatty qyzyqtym. Sol kezden bastap, osy kisi jaıly fılm túsirgim keldi. Balýan Sholaqtyń boıynda aqyndyq, serilik, ánshilik jáne alyp qara kúsh te bar. Onyń eline, jerine, otanǵa degen mahabbaty árqaısymyzǵa úlgi bolarlyq. Meniń oıymsha, búginginiń jastary Balýan Sholaqtaı erdi bilýi tıis».
Fılmniń senarıi birneshe jyl boıy jazylǵan jáne qaıta óńdelgen. Túsirilim toby fılmniń sapaly shyǵýy úshin arnaıy mamandardy shaqyrǵan. Olardyń qatarynda: kórkemdik jetekshisi S.Narymbetov, kórkemdik keńesshileri E.Tóleýtaı, B.Ystybaev, B.Bedelhandar bar. Kartınaǵa tanymal akterlarmen qatar, ekranǵa alǵash shyǵyp jatqan debútanttar da túsedi. Biraq olardyń esimderi áli atalmaı otyr.
«Akterlar irikteldi. Alaıda bas keıipkerdi ázir aıta almaımyn. Sebebi, eki akterdiń arasynda tańdaý ústindemin», - deıdi rejıser.
