Qaraǵandy oblysynda tabıǵı sıpattaǵy tótenshe jaǵdaı jarıalandy, - dep habarlaıdy qamshy.kz
Baspasóz qyzmetiniń málimetinshe, Buqar jyraý, Qarqaraly jáne Abaı aýdanynyń jekelegen eldi mekenderinde sý tasqyny bolǵan. Osydan keıin bul aýdandardyń ákimderi jergilikti kólemde tabıǵı sıpattaǵy TJ jarıalaý týraly sheshim qabyldaǵan.
"Qazirgi kezde jeti eldi mekende turǵyn úıler men aýla aýmaqtary sý astynda qaldy: Sarytóbe, Chkalovo, Sadovoe, Andreınıkovka, Qyzyljar, Krasnaıa Polána, Qaramuryn. Chkalovo jáne Sadovoe aýyldarynda 49 jáne 42 baspanany sý basqan. Chkalovodan 137, Sadovoe aýylynan 308 adam qaýipsiz jerge kóshirildi. Úsh eldi mekende - Qaraǵaıly jáne Qaıraqty, Tuzdy aýyldyq okrýgynyń 1-maı bólimshesinde - sý basý qaýpi saqtalady. Shopa aýylynda Sherýbaı-Nura ózeninde arnasynan asqan sý joldardy shaıyp ketti. Oblysta avtomobıl joldarynyń segiz ýchaskesin sý basty. "Qaraǵandy-Qarqaraly" jol ýchaskesinde kóliktiń barlyq túrleri úshin kólik qozǵalysy toqtatyldy", - delingen habarlamada.
Aıta ketsek, keshe keshkisin sý tasqyny saldarynan Aqtóbe oblysynda da tótenshe jaǵdaı jarıalanǵan bolatyn. Elek, Qarǵaly, Sazdy, Jińishke jáne Butaq ózenderi arnasynan tasyp, 283 saıajaı úıin sý basty. 5 úı qırap qaldy. Kesheli beri 700-den astam adam qaýipsiz jerge kóshirildi. Eki mekteptiń ǵımaratynda 12 evakýasıa pýnkti ashylǵan. Arnaıy orynǵa 200-den astam adam jetkizildi. Elek ózeniniń qos jaǵasynda da qoǵamdyq tártip kúzeti men qutqarýshylar toby jumys istep jatyr. Tasqyn saldaryn joıýǵa tótenshe jaǵdaı qyzmeti, Ulttyq gvardıa, jergilikti polısıa qyzmetinen barlyǵy 500 adam men 124 birlik tehnıka jumyldyrylǵan. Qutqarý jumystary áli de jalǵasyp jatyr. Arnaıy qurylǵan komısıa tótenshe jaǵdaıdyń shyǵynyn anyqtaıtyn bolady. Mundaı jaǵdaı óńirde osydan 20 jyl buryn bolǵan.
Sondaı-aq, Qostanaı oblysyna da sý tasqyny saldarynan tóngen qaýip kúsheıdi. Aımaqta alqaptardaǵy qar erip, sý deńgeıi kóterildi. Sonyń saldarynan birneshe eldi meken apatty jaǵdaıda tur. «Áýlıekól aýdany, Kóktal aýylynda eki turǵyn úıge sý kirip ketken. Qazir ol jerde sýdy burý jumystary júrip jatyr. Al Qarasý aýdanynda eki eldi mekende 7 úı sý astynda qalyp, adamdar qaýipsiz jerge kóshirildi. Qutqarý sharalaryna 40-qa tarta tehnıka men 70-ten astam adam kúshi jumyldyrylǵan dep málimdeıdi oblystyq tótenshe jaǵdaılar departamentiniń baspasóz hatshysy. Qazir túrli áleýmettik jelilerde irgesine deıin sý jetken eldi mekenderdiń vıdeolary kóbeıgen.
Jeksenbi kúni Aqmola oblysynda da sý tasqyny bolyp, erigen qar sýy oqýshylar mingen avtobýsty aǵyzyp áketken. Oqıǵanyń kýágerleri tasqyn sýdyń joldan asyp-tasyp jatqany túsirilgen beınejazbany jarıalaǵan bolatyn. Keıinirek anyqtalǵandaı, oqıǵa 16 sáýir kúni Sandyqtaý aýdanynda Atbasar-Kókshetaý jolynda Balkashıno jáne Maksımovka aýyldarynyń arasynda bolǵan.
Odan bólek, Sandyqtaý aýylynyń turǵyndaryn kóshirip jatqan kezde sýǵa ketken úılerdiń birinen 59 jastaǵy áıeldiń múrdesi tabyldy. Áıeldiń neden kóz jumǵany anyqtalyp jatyr.
Aıta keteıik, Sandyqtaý aýylynda Jabaı ózeninde sý deńgeıi kóterilýiniń saldarynan jeti úı men aýlany sý basty. 17 adam, onyń ishinde 5 bala kóshirilgen.
Aldaǵy ýaqytta sý tasqyny taǵy da kúsheıýi múmkin. Aýa raıyn boljaýshylar aldaǵy birneshe kún jaýyn-shashyndy bolady dep boljap otyr.
Atmosferalyq aǵymdardyń ótýine baılanysty dúısenbi kúni Qazaqstanyń basym bóliginde jańbyr jaýyp, ońtústik pen ońtústik shyǵysynda naızaǵaı soǵady. Respýblıkanyń birqatar aımaqtarynda tuman túsip, soltústik aımaqtarda jel kúsheıedi, dep habarlaıdy «Qazgıdromet» RMK. Aqmola, Pavlodar, Soltústik Qazaqstan oblystarynda jeldiń kúshi sekýndyna 15-20 metrge, keı jerlerde 30 metrge jetedi. Soltústik Qazaqstan oblysynda tuman túsedi dep kútilýde. Qostanaı, oblysynyń birqatar aımaqtarynda jeldi ekpini sekýndyna 15-20 metrge deıin jetedi. Keı jerlerge tuman túsedi. Qaraǵandy oblysynyń keı jerlerinde jeldiń kúshi 17-22 metr/sekýnd bolady. Ońtústik Qazaqstan, Almaty oblystarynda da jel 15-20 metr/sekýndqa deıin kúsheıedi. Jambyl, oblysynda naıǵaǵaı soǵyp, jel kúsheıedi. Qyzylorda, Batys Qazaqstan oblystarynda kúndiz Mańǵystaý oblysynyń keı jerlerinde jeldiń kúshi sekýndyna 15-20 metrge jetedi. Shyǵys Qazaqstan oblysynda jeldiń ekpini 15-20 metr-sekýnd bolady, keı jerlerde 25 metrge jetedi. Túnde jáne tań ata tuman túsedi. Aqtóbe oblysynda tuman.
