Shekarada tárkilengen 50 myń dollaryn daýlap júrgen Gúljan Máýithannyń qylmysty bolǵany óz aldyna, endi uly men inisi de jaýapqa tartylmaqshy eken. 4 kún buryn ótken sot otyrysynda osyndaı qaýly qabyldanypty. Buǵan deıin 9900 dollardyń jalǵyzbasty ananyń ulyna qaıtarylǵanyn aıtqan bolatynbyz. Endi qalǵan 40 myń dollar memlekettiń menshigi bolyp qala bere me?
Sottyń úkimimen Gúljan Máýithan aıypty dep tanyldy. Iaǵnı, ekonomıkalyq kontrabandamen aınalysty delinip, 68 myń teńge aıyppul salynǵan. 40 myń dollardy memlekettiń kirisine alyp qoıǵany taǵy bar. Zaısanǵa úlken úmitpen barǵan jalǵyzbasty ananyń taýy shaǵylyp qaıta oralǵan, dep habarlaıdy Qamshy aqparattyq agenttigi 31 arnaǵa silteme jasap.
Sot barysynda jańa derekter belgili bolypty. Shekarashylar olardyń naqty qansha aqsha alyp kele jatqanyn aldyn ala bilgen kórinedi. Jalǵyzbasty ana olaı bolsa shekaradan ótip, avtobýsqa otyrǵansha kútpeı zańdy jolyn usynsa bolar edi dep ashynyp otyr.
GÚLJAN MÁÝİTHAN, oralman:
- Biz "aqsha joq" dep qashyp turǵanymyz joq. Aıyppulynan da qashyp turǵanymyz joq. "Mynandaı sizderde aqsha bar eken. Deklarasıa deı me, sony toltyryńdar" dese biz odan qashyp turǵanymyz joq. Bizdi barynsha qylmysqa ıterip, áýreshilikke salyp 2 aı mine.
Alaıda, sýdıalar jazylǵan zańnyń sheńberinde sheshim shyǵardyq dep otyr. Tipti sol zańǵa súıenip jalǵyzbasty ananyń inisi men balasyn da jaýapqa tarpaqshy eken.
NURMAHANBET ELEMESOV, Shyǵys Qazaqstan oblystyq sotynyń sýdıasy:
- Máýithan Gúljannyń balasy jáne onyń inisi aldyn ala tergeýde bergen jaýaby jáne sotta bergen jaýaby ekeýi qarama-qarsy kelgendikten sot osyndaı jeke qaýly shyǵarǵan. Jeke qaýlyda Zaısan aýdandyq prokýrorynyń nazaryna aýdarǵan.
Iaǵnı, sotta jalǵan jaýap bergeni úshin qylmystyq jaýapkershilikke tartylmaq. Alaıda, Ádilbek tárkileý kezinde kedenshiler men shekarashylardyń aıtqanyn istedik deıdi.
ÁDİLBEK MUQASHULY, G.Máýithannyń uly:
- Birinshi kezinde rasynda bizge "1 adamdyki dep aıtyńdar, ázir sóıtip aıtsańdar qazir jiberemiz. 50 myń teńge shtraf qana tóleısińder" dep basynda aldaǵan. Naǵashy aǵany qorqytqan. "Sen óıtip ana kisiniki dep aıtpasań seni qara tańba basyp, áıeliń men bala-shaǵań shyryldap osy jaqta qalady, seni Qytaıǵa qýyp jiberemiz" dep.
Sýdıalar bul aıyptaýlar týraly tis jarmady. Al Zaısan sotynyń sheshimi zańdy kúshine enbegenin alǵa tartyp, núkte qoıyldy deýge erte ekendigin aıtty. Gúljan Máýithan bolsa, 40 myń dollardan kúderin úze bastaǵan.
Zańdy bilmeý - jaýapkershilikten arashalaı almaıdy. Bul - quqyq qorǵaýshylardyń osyndaı jaǵdaıda aıtatyn jattandy ýáji. Durys árıne. Biraq, qasaqana emes, bilmestikten ketken qatelikterge osynshama shúıligý, Prezıdenttiń ózi bastamashy bolǵan "Uly kóshke" kedergi keltiretini kóp azamattardy oılandyrmaıtyn sıaqty.
