Rım qalasynda Aqan Sataev pen Álıa Nazarbaevanyń tarıhı dramasynyń kórsetilimi boldy, dep habarlaıdy Qamshy aqparattyq agenttigi.
Rımde rejıser Aqan Sataev pen bas prodússer Álıa Nazarbaevanyń «Anaǵa aparar jol» fılminiń gala kórsetilimi bolyp ótti. Italándyqtar Qazaqstannyń aýqymdy tarıhı kıno jabasyna óz baǵalaryn berdi. Qazaqstandyq kórermen syndy ıtalándyqtar da kóz jasyna erik berdi. Búgin, 17sáýir kúni, fılm Mılanda kórsetilmek.
Fılmniń kórsetilimi «Casa del cinema» kınoteatrynda ıtalánsha sýbtırtlarmen Qazaqstannyń Italádaǵy elshiliginiń qoldaýymen ótti. Fılm rımdikter men qala qonaqtarynyń qazaq halqyna degen qyzyǵýshylyǵyn oıatty. Kórermen fılmdi jyly qabyldap, kóz jasyna erik berdi.
Pres-konferensıaǵa jáne kórermendermen kezdesýge fılmniń bas keıipkerleri Arýjan Jazylbekova men Altynaı Nógerbek qatysty.
«Anaǵa aparar jol» fılmi bas keıipkerge ómirdiń qıyndyqtaryn jeńýge kómektesken ananyń sheksiz mahabbatynyń kúshi týraly. Fılmde 1930 jyldan bastap, bizdiń búgingi kezeńge deıingi aýqymdy ýaqyt qamtylǵan. Negizgi oqıǵa qazaq halqynyń basyndaǵy aýyr kezeńder: ujymdastyrý, jut, soǵys jáne soǵystan keıingi kezeńder týraly. Fılm rýhanı qundylyqtar týraly oılanýǵa jáne ómirge degen kózqarasty ózgertýge septigin tıgizedi.
Tarıhı drama Qazaqstan, Belorýssıa men Ázirbaıjanda túsirildi. Mınskte soǵys kezeńi taspalanǵan bolatyn. «Dneprdi alý» kórinisinde 500-ge jýyq adammen, 300 áskerı tehnıka túsirildi. Fılm túsirilimine 2 myńnan astam adam qatysqan bolatyn.
Fılm Ialtadaǵy «Evrazııskıı most» kıno festıvalinde Gran-prıge ıe boldy. Jáne de fılm Italıada kórsetilip jatqan kezeńde rejıser Aqan Sataev osy fılmi úshin Bishkekte Ortalyq Azıanyń «Aq bars» VI Ulttyq kıno júldesinde jyldyń úzdik fılmi júldesin aldy.
«La strada verso la madre» «Anaǵa aparar jol» ıtalán tiline osylaı aýdarylady. Óte qatty qobaljydyq. «Casa del Cinema» kınoteatrynda bizdiń «Anaǵa aparar jol» fılmin ıtalándyqtarǵa kórsettik. Italányń myqty akterler men rejıserlerdiń otany ekenin ózderińizder de bilesizder... Qatty qoryqtyq. Al sosyn: «Bravissimo, Grazie, Molto bene»! Tamasha tolqynys sezim», - dep jarıalady óziniń Instagram paraqshasynda Arýjan Jazylbekova.
«Árıne ana bolý – tamasha ári jarqyn sezim, ana qaı jerde bolmasyn ana. Menińshe, álemdegi bar ananyń ishki sezimi birdeı. Kez kelgen eldegi ana bul fılmdi jaqsy túsinedi», - dep bólisti Altynaı Nógerbek.
Esterińizge sala keteıik, fılmdi Sh.Aımanov atyndaǵy «Qazaqfılm» AQ men «Jańa álem» JSHS Qazaqstan Respýblıkasy Mádenıet jáne sport mınıstrliginiń tapsyrysy boıynsha túsirgen.
«Biz kúlli álemdi óz tarıhymyzben, mádenıetimizben, jalpy elimizben tanystyrǵymyz keledi. Sondyqtan fılmdi ártúrli elderde kórsetýge tyrysamyz. Osyǵan deıin fılm Los-Andjeles pen Máskeýde kórsetilgen bolatyn. Jáne osy fılmdi basqa festıválderde kórsetsek degen oıymyz bar», - dep málimdedi «Jańa álem» JSHS prodúseri Ikram Karımov.
