14 sáýir kúni 8 jastaǵy búldirshin maskúnemniń qurbanyna aınalýǵa shaq qaldy. Alaıda, jalpy jurtqa belgili bolǵandaı, 17 jastaǵy Tımýr esimdi azamat qyzdyń ómirine arasha túsip, qylmyskerdi qolǵa túsirýge edáýir kómegin tıgizgen. Bul jaıynda barsha ınternet jelisine taralyp, erlik jasaǵan jas jetkinshek eldiń yqylasyna bólenýde. Pedofılder kóbeıip, sábı zorlaý isi – búgingi tańda órship turǵan másele, dep habarlaıdy Qamshy aqparattyq agenttigi.

«Men bul balanyń esimin ǵana bilemin – Tımýr. Ony óz kózimmen kórgenim joq, alaıda ol óte batyl áreket jasady. 14 sáýir kúni keshki 18:00 shamasynda Qonaev atyndaǵy mekteptiń joǵarǵy synyp oqýshysy úlken báleniń aldyn alyp, kishkentaı búldirshinniń ómirin, bolashaǵyn qutqaryp qaldy. Óz ómirin qaterge tige otyryp, zorlamaq bolmaq pedofılden búldirshindi arashalap aldy. Búkil el tanýǵa turarlyqtaı jigit. Quzyrly oryndar bul jigitti baıqap, kóp adamnyń qolynan kele bermeıtin batyldyǵy úshin marapattaý durys bolady. Qazirgi qoǵamda ómir súrip jatqan adamdar adamdyǵyn joǵaltqan, sol búldirshinniń janynan ótip bara jatqan kóptegen úlken kisiler kómek qolyn sozbady. Al bul jigit kishkentaı qyz kómekke shaqyryp, aıqaılaǵanda oılanbastan qyzǵa kómekke júgirip, qutqaryp qaldy», - dep jazady Facebook qoldanýshysy Islam Kýraev óziniń jeke paraqshasynda.

Derekterge sáıkes, polısıa qyzmetkerleri segiz jastaǵy búldirshinniń ómirin qutqaryp qalǵan Tımýrdy marapattaýǵa qatysty sheshim qabyldamaq.

Esterińizge sala ketsek, Eńbekshiqazaq aýdanynda jantúrshigerlik oqıǵa oryn alýǵa shaq qaldy. Ashshy sýdy iship alǵan maskúnem segiz jastaǵy qyzǵa tap berip, ony zorlamaq bolǵan. Alaıda, mektep oqýshysynyń batyl is-áreketiniń arqasynda kishkentaı qyz aman qaldy. Atalmysh oqıǵaǵa qatysty Tımýr: «Meniń ornymda basqa bireý bolsa, ol da dál meniń is-áreketimdi qaıtalaıtyn edi», - deıdi.