Qaraǵandy oblysynyń 13 jastaǵy turǵyny jeke tis emhanasynda qaza tapty. Qaıǵyly jaǵdaı osydan 1 jyl buryn oryn alǵan. Alaıda, qyzdyń ata-anasy medbıkelerdiń jazasyn áli almaǵanyna nalıdy, dep jazady Qamshy aqparattyq agenttigi.

KTK arnasynyń málimetinshe, Jansaıa Omarova kishkentaı kezinen sal aýrýyna shaldyqqan. Qyzyn aýrýynan aıyqtyrý úshin ata-anasy bárin istedi: emdik qasıeti bar teńizderge apardy, sheteldik mamandarǵa da qaraldy, sondaǵy nátıje – qyz óz erkimen turyp-júre aldy, sóıleı aldy. Alaıda, tis emhanasynda qaıǵyly jaǵdaı oryn alady dep eshkim oılaǵan joq.

Marjannyń ákesi qyzyn eske ala otyryp, bylaı deıdi:

«Oǵan narkoz jasady. Ádette, aldymen synaqtan ótkizýshi edi, ondaı eshteńe bolǵan joq. 16 tisin julyp alý kerek dedi. Bir kúnniń ishinde 16 tisin julyp, emdeý múmkin be dep tańqaldyq. Dárigerler bári jaqsy bolatynyna sendirdi. Biz sendik. Mamannyń aty maman ǵoı».

Qyzdyń jaǵdaıy nasharlap ketken soń, tis dárigerleri óz betterinshe kómek kórsetpek boldy. Bunyń bári vıdeo kameraǵa anyq túsirilgen. Tek birneshe ýaqyttan keıin esh nátıje shyqpaǵan soń jedel-járdem shaqyrdy. Ókinishke oraı, tym kesh boldy. Saraptama nátıjesi Jansaıanyń narkozdan anafılaktıkalyq eseńgireýge shaldyqqanyn dáleldedi. Tergeý barysynda da klınıkanyń anestezıa ótkizýge lısenzıasy bolmaǵanyn anyqtaǵan. Alaıda, is sotqa sol kúıi jetpegen.

«Tergeý 1 jylǵa sozyldy. Biraq nátıje joq. Sarapshylar basqa da aýrýhanalardy, emhanalardy tekserip, ýaqytty sozýda. Ne úshin? Sot-medısınalyq saraptamanyń nátıjesi de aıqyn dálel emes pe?» deıdi advokat Tóleýbaı Mýsın.

Al, emhana qyzmetkerleri ózderin sútten aq, sýdan taza etip kórsetpekshi. Qyz qaıǵyly jaǵdaıda qaza tapty dep syltaýratyp otyr. Onyń ústine, lısenzıa bolmaǵany úshin aıyppul tóleý kerek eken. Alaıda, Jansaıany qabyldaǵan anestezıolog qaıta daıarlaý kýrstarynan ótip, balalarǵa narkoz berýdi jalǵastyryp júrgen kórinedi.

«Jansaıaǵa deıin jezqazǵandyq bala da eki ret emdelgen, dál sol preparattardy qoldandyq, nátıjesi de jaqsy bolǵan» dep aqtaldy tis emhanasynyń dırektory Erlan Anajbaev.

Qaza tapqan qyzdyń ata-anasy tis dárigerlerin qatań jazalaýdy talap etip otyr. Polıseı qyzmetkerleri respýblıkalyq saraptamanyń jetkiliksiz ekenin alǵa tartyp, tergeý jumystaryn jalǵastyryp jatyr. Al, otbasy qorǵaýshysy ondaı tergeýdiń qajeti joq ekenin aıtady. İİD basqa aqparattardy berýden bas tartty.