Bilimdi urpaq – memlekettiń keleshegi, al bilimmen qatar ónerdiń týyn  jelbiretip júrgen jas órenderimiz qanshama. Ár halyqtyń, ár ulttyń, adamzat qoǵamynyń erteńgi kúnge úmit artar senimi  de, serigi de – balalar.  Osy tusta jasóspirimderdiń juldyzy janyp, tanymal ánshilerdiń synynan súrinbeı ótýge jol ashqan, qyraǵy kózdi qazylar alqasynan ádil baǵalaryn alýǵa múmkindik bergen, kópshilik qaýym kórermenniń qoshemetine bólendirgen, jas talanttardyń bolashaǵyna joldama bergen «Aıgólek» balalar baıqaýynynyń alatyn orny erekshe.  2009 jyldan 2014 jyl aralyǵynda Qazaqstannyń túpkir-túpkirinen kelgen 5 jastan 14 jasqa deıingi daryndy balalar 5 maýsym boıy  dúbirli dodada baq synasyp, óz ónerlerimen kópshiliktiń kóńilinen shyǵa bildi.

«Aıgólek» balalar baıqaýynyń ár kezeńinde baq synasqan bala kúninen sahnaǵa áýestenip, óner jolyn tańdaǵan jastarmen Qamshy aqparattyq agenttiginiń jýrnalısi suhbattasqan bolatyn. Suhbat barysynda jas ónerpazdar ózderiniń jeke shyǵarmashylyǵyndaǵy jańalyqtarmen bólisip, «Aıgólek» balalar baıqaýynda juldyzy janǵan balalar jaıynda aıtyp berdi.

Álıhan Baısultanov, «Aıgólek» balalar baıqaýynyń 1 maýsym qatysýshysy ári júrgizýshisi: Jeke shyǵarmashylyǵymda jańalyqtar kóp, ózgerister de bar. Máselen, jańa ánder jazyp, beınebaıandy da josparlaýdamyz. Búginde «Óner qyrandarynyń» beldi akteri, ónerdegi, ómirdegi aǵam Ánýar Shymyrqulovpen birlese jumys istep jatyrmyz. «Aıgólekke» qatysyp búgingi kúnde Roza Rymbaeva, Toqtar Serikov, Mels Saǵatulymen jumys istep júrgen talantty ónerpazdar bar. Olar: Aıgerim Mergenbaı, Darıa Bolsanbek, Donov Eldos, Alısher Jaqsybaı.

Alısher Jaqsybaı, «Aıgólek» balalar baıqaýynyń 2-shi maýsym qatysýshysy: Shyǵarmashylyǵym jaıly aıtatyn bolsam qazirgi kezde Mels Saǵatulymen birge jumys istep jatyrmyn. 2014 jyly Peterbor qalasynda ótken «Pýt k zvezdam» baıqaýynda  2-oryn ıegeri atandym jáne qazirgi kúnde óner salasymen qatar sportty qatar alyp júrgen jaıym bar. Óner jolynda ózimdi shyńdap, beınebaıandar túsirmek nıettemin.

Darıa Bolsanbek, «Aıgólek» balalar baıqaýynyń 2-shi maýsym qatysýshysy: Shyǵarmashylyǵymdaǵy jańalyqtardy aıtar bolsam,  «Aıgólek» balalar baıqaýyna qatysqannan keıin Latvıa, Lıtva, Qytaı, Italıa memleketterinde ótken baıqaýlarda birinshi oryndy ıelendim. Al osy jyly Maıra Ilásova apamyzdyń  uıymdastyrýymen ótkizilgen «Jan anam», «Saǵyndyrǵan ánder-aı» konsertterine qonaq retinde shaqyrylyp,  Roza Rymbaeva apamyzben birge án aıttym.  Al «Aıgólekke» qatysqan balalar jaıly aıtar bolsam barlyq qatysýshylar óte myqty boldy, azdaǵan ýaqyt ishinde barlyǵymyz bir-birimizge baýyr basyp qaldyq. «Aıgólek» baıqaýynan men úlken tájirıbe jınaqtadym jáne jas juldyzdardyń janýyna jol ashqan Ǵalıa Baıbosynovaǵa úlken alǵys bildiremin.

Eldos Donov, «Aıgólek» balalar baıqaýynyń 4-shi  maýsym qatysýshysy: «Búginde ózimniń ustazym Toqtar Serikovpen birlesip jumys istep jatyrmyn jáne jeke avtorlyq ánderim jaryq kórýde. Bolashaqta ánshi bolý meniń armanym jáne óner jolynda árdaıym izdenis ústindemiz.  «Aıgólek» balalar baıqaýy, eń aldymen, maǵan tájirıbe berdi dep esepteımin, óıtkeni ár kezeńnen ótken saıyn qazylar alqasy bizdi ár qyrymyzdan kórgisi keldi. Sonyń arqasynda biz shyńdala tústik. Qazaqstannyń túpkir-túpkirinen kelgen balalarmen dostastyrǵan «Aıgólek» balalar baıqaýynyń uıymdastyrýshylaryna alǵysym sheksiz jáne osy tektes baıqaýlar kóptep bola berse eken degen tilegim bar.

Respýblıkalyq «Aıgólek» balalar baıqaýy – bolashaqtyń bastaýy. Jas talanttardyń halyqqa tanylýyna jol ashqan óner saıysy kórermenniń yqylasyna bólengenin aıta ketken jón jáne jas ónerpazdardyń juldyzyn jaqqan televızıalyq baıqaý óz jalǵasyn tabady degen úmittemiz. Osy rette Respýblıkalyq «Aıgólek» balalar baıqaýynyń prodúseri Baıbosynova Ǵalıa Ahatqyzynyń pikirin suraǵan bolatynbyz.

«Aıgólek» balalar baıqaýynyń prodúseri Baıbosynova Ǵalıa Ahatqyzy: «Búginde «Aıgólek» balalar baıqaýynyń 1-shi maýsymynda óner kórsetken ónerpazdardyń jasy 17 men 19 aralyǵynda jáne basym kópshiligi óner jolynda bilim alýda. Al «Aıgólek» baıqaýyna qatysqan ónerpazdar úlken mektepten ótti, sebebi 4-5 aınalym kezinde ónerpazdar horeografıadan, vokaldan sabaq alyp, kamera aldynda jumys isteý qabiletin damytady, sahnamen jumys isteýdi úırenedi. Sonymen qatar «Aıgólektiń» sahnasynda ósken júrgizýshilerimiz Alıhan  6 jasynan, Nazym 8 jasynan, Erkesh 10 jasynan bastap Respýblıkalyq baıqaýdyń ortasynda júr. Búginde Alıhan jeke dara ánshi, Ulttyq arnada «Áke» serıalynyń basty rólin somdady.  Erkesh pen Nazym «Lúpil» tobynda óner kórsetip, kámelettik jasqa tolǵan soń Erkesh «Alem Band» tobyna, al Nazym «Keshú»  tobyna shaqyrtý aldy. Shamamen 7-8 jyl kóleminde «Aıgólekte» óner kórsetken jańa býyn Qazaq estradasyna keledi dep senemin. Al televızıalyq «Aıgólek» baıqaýy 2 maýsym boldy ótkizilip jatqan joq, buıyrtsa Ulttyq arnadan taǵy baıqaýymyz óz jalǵasyn tabady degen úmittemiz»

«Aıgólek» balalar baıqaýynyna qatysý úshin Qazaqstannyń ár qalasynan usynystar túsip jatqanyn aıtyp, baıqaýdyń óz jalǵasyn tabýy Ulttyq arnanyń sheshimine baılanysty ekenin atap ótti belgili prodúser Ǵalıa Ahatqyzy.

«Ánshi balapan» baıqaýynyń qatysýshylary búginde sahnanyń júırikterine aınalsa, «Aıgólek» balalar baıqaýy jas ónerpazdarǵa jol ashatyny anyq.  Endeshe, «Aıgólektiń» juldyzdaryn birge jaǵaıyq!

Qamshyger: Aıgerim TAÝBAI