14 sáýir kúni Elbasynyń «Bolashaqqa baǵdar: rýhanı jańǵyrý» atty joldaý maqalasyna baılanysty M.Áýezov atyndaǵy Qazaq Memlekettik akademıalyq drama teatrynda ujymnyń jáne BAQ ókilderiniń qatysýymen talqylaý jıyny ótti dep habarlaıdy Qamshy AA teatrdyń baspasóz qyzmetine silteme jasaı otyryp.
Jıyn barysynda teatr dırektory Erlan Bilál el ıgiligi úshin jasalyp otyrǵan jobanyń halyqqa usynylýymen jınalǵan qaýymdy quttyqtady. Teatr ártisteri maqalanyń oryndy ýaqytta jarıalanǵanyn atap ótip,óz oılaryn ortaǵa saldy:
Asanáli Áshimov:
Elbasymyzdyń joldaý maqalasyndaǵy rýhanı jańǵyrýdy bizdiń damýymyzdyń eń basty belesteriniń biri dep esepteımin. Sebebi, rýhy, salt – dástúri, tili joǵalǵan halyqty eshkim, eshqashan bilmek emes. Tarıhyn boıyna sińirip ósken urpaq qana myqty bolyp, álemge qyraǵy kózben sholý jasap, qoryqpaı qanat qaǵyp, qajyrly eńbek etetini sózsiz! Sondyqtan, Elbasymyz búgingi kúnniń ǵana múddesin oılap qoımaı, urpaqtan – urpaqqa sabaqtasyp jatatyn, saǵyn syndyrmaı, baryn barymtalatpaı, baǵyn baltalatpaı, ózim degende ózeginde ar men namys bite qaınasyp jatatyn ul men qyzdyń ósip – ónýine jan – jaqty jaǵdaı jasalatyn baǵyt siltep otyr. Endi, biz, árbir sátte jalǵyz maqsatqa jappaı qoldaý bildirip, jumyla atsalyssaq jarqyn bolashaqqa qadam basqan ár perzentimizge tabystaıtyn muramyz da jarqyn bolady.
Erlan Bilál:
Búgingi Elbasymyz N.Á.Nazarbaevtyń «Bolashaqqa baǵdar: rýhanı jańǵyrý» atty joldaý maqalasynda aıtylǵan rýhanı jańǵyrý men zamanaýı ilgerileýdiń júgenin tartyp ustasyp, júgin qatar kóterisetin azamat, azamatsha tárbıeleı alý men bilimdi, jan-jaqty urpaǵy bar elderdiń kóshbasshysy bolý qaı-qaısymyzdyń da kókeıimizge qonary haq! Elbasynyń «Maqsatqa jetý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis» , «Jańǵyrý eldiń ulttyq - rýhanı tamyrynan nár alýy kerek» - degen sózderiniń astarynda el múddesin basty qundylyq dep baǵalaý jatyr. Endeshe, bul súbeli oıdy barlyǵymyz da qoldaýǵa tıistimiz!
Jasulan Baısalbekov:
Táýelsiz Qazaqstannyń kún saıyn ǵaryshtap damýy jolyndaǵy basty qaǵıdalarynyń beriktigi negizinde Otanymyz túbegeıli jańǵyrý men jańa múmkindikterge jol ashýǵa qabiletti bolyp otyr. Barsha qazaqstandyq jastar Elbasymyz Nursultan Ábishulynyń qundylyǵy zor maqalasynan úlken jiger, bolashaqqa degen senim aldy! Elbasy synaptaı syrǵyǵan ýaqyt eshkimdi kútip turmaıdy, jańǵyrý da tarıhtyń ózi sıaqty jalǵasa beretin proses dep jastardy zaman talabyna saı jan-jaqty bolýǵa úndedi. «Bolashaqqa baǵdar: Rýhanı jańǵyrý» maqalasy arqyly N.Á.Nazarbaev damyǵan 30 eldiń qataryna qosylý jolynda jastardyń qosar úlesi orasan zor mańyzǵa ıe ekendigin basa kórsetti. Biz artylǵan úmit pen senimdi aqtaýǵa aıanbaı eńbek etýge daıynbyz!
Saltanat Baqaeva:
Zamanǵa saı bolý, álemdik sana qaǵıdalaryn qalyptastyrý,damyǵan eldermen Otanymyzdyń terezesi teń turýdy basty maqsat etken Elbasymyz N.Á.Nazarbaevtyń syndarly saıasaty qazaqstandyqtardyń múddesine baǵyttalǵan, ulttyq tarıh, búginimiz ben bolashaǵymyz arasyndaǵy dánekerleýshi kópir ispetti. Bilim salasy, tárbıe, otbasy,ár adamnyń tulǵalyq qalyptasýy,ultqa degen sheksiz mahabbat qashanda júregimizde saqtalýy kerek ekeni, Atameken aýylymyzdyń qadir-qasıetin de umytpaýǵa shaqyrǵan Elbasynyń «Bolashaqqa baǵdar: rýhanı jańǵyrý» maqalasy jan-jaqty qamtylyp, ulttyq múddede bolýy qýantady!
Elbasy Nursultan Ábishuly joldaǵan «Bolashaqqa baǵdar: rýhanı jańǵyrý» maqalasy keleshegimizge nyq qadam jasaýǵa, baǵyt-baǵdarymyzdy anyqtap, naqty maqsat-mindet qoıýmyzǵa yqpal etetin joldaý boldy. Ult kóshbasshysy aıtqan ulttyq sana-sezimniń kókjıegin keńeıtý, ulttyq kodty saqtaý úshin ár sala mamandary ózinshe izdenip, josparly eńbek etýi tıis degen Elbasy maqalasyndaǵy qundy usynystarǵa Áýezov teatrynyń ujymy bir aýyzdan qoldaý tanytatyndaryn jetkizdi.
