QR Mádenıet jáne sport mınıstri Arystanbek Muhamedıuly qazaqstandyqtardyń jyldyń salqyn mezgilderinde de zoobaqtar men botanıka baǵyna baratyndaı jasaıtynyna ýáde berdi dep habarlaıdy Qamshy AA informburo.kz-ke silteme jasap.

Mınıstr Úkimet otyrysynda vedomstvo dittegen maqsatyna nelikten jete almaǵanyn túsindirip berdi.

«Týrızm salasynda eń yńǵaıly mezgil – jaz ben kúz. Jyldyń sońynda barlyq kórsetkishke ıe bolamyz. Teatr, mýzeı, botanıkalyq baq jáne t.b. demalys oryndaryna barý kórsetkishi boıynsha tómen bolyp tur. Sebebi qańtar, aqpan, naýryz aılarynda atraksıondarǵa bara almaımyz. Óte sýyq. Onyń ishinde zoobaqtar, botanıkalyq baqqa qańtar aıynda barý qıynǵa soǵady» dedi Arystanbek Muhamedıuly.

«Jazda ystyq, qysta sýyq. Endi ne isteımiz?» dep Úkimet basshysy mınıstrdiń sózin bóldi.

«Biz árıne qysta zoobaqtarǵa, botanıkalyq baqqa barýǵa tyrysamyz. Alaıda óte qıyn» dep jaýap berdi mınıstr.

Arystanbek Muhamedıulynyń mundaı aqtalýyn estigen zalda otyrǵandar kúlkisin tyıa almady. Úkimet basshysy da ezý tartty.

«Kúlemiz. Alaıda jumys isteý kerek. Qurmetti mınıstrler, 24 ındıkator boıynsha 9-y dittegen mejesine jetpedi. Biz mundaı kórsetkishti alǵash qabyldap otyrmyz jáne uzaq ýaqytqa deıin ony qabyldaı almaımyz.   Jumys isteńder. Nátıje kórsetińder!» dep mınıstrler kabınetine eskertý jasady Baqytjan Saǵyntaev.

Onymen qosa, barlyq maqsatty ındıkatorǵa qol jetkizgen jaǵdaıda Qazaqstan ekonomıkasy 0,55% joǵarylaýy múmkin ekenin aıtty.

Maqsatty kórsetkishke tek Mádenıet mınıstrligi ǵana emes basqa da vedomstvolar jetpegen. Qazaqstannyń premer-mınıstri mınıstrler kabınetin synǵa aldy.