Álemde túrli qyzyq bar. Máselen, ǵalamnyń ártúrli bóliginde quqyq qorǵaý organdarynda jan-janýarlar, tipti, qustar qyzmet etedi. Qamshy AA erekshe tártip saqshylaryn nazarlańyzǵa usynady.

It

Adam qolyna eń birinshi úırengen ıt bolatyn. Erte zamannan beri ol adamnyń adal dosy. Al 1816 jyldyń 8 sáýirinde býlterer tuqymdy ıt Shotlandıada vıskıdi zańsyz satatyn adamdy ustap bergen. Osy kezden bastap olar quqyq qorǵaý organdaryna jumysqa alynǵan.

Qazir ıtter shekarada, polısıada qyzmet jasaıdy. Sonymen qatar, Ulybrıtanıanyń Kerkbrı qalasynda kollı tuqymdy ıt ákimshilik jumystaryna kómek berip, keńsede qujattardy rettestiredi.

Jylqy

Álemniń kóptegen memleketerinde atty ásker bar. Olardyń tózimdiligi, júıriktigi arqasynda keıbir kólik júre bermeıtin jerlerde tártip saqshylary osy attardyń kómegine súıenedi. Alǵash atty ásker aǵylshyndarda paıda bolǵan. Anglıada atty áskerge, onyń ishinde jylqylarǵa asa úlken qurmetpen qaraıdy. Olar týraly ártúrli fılmder men serıaldar túsirilgen.

Bizdiń elimizde shekara aımaqtarda onyń ishinde Kaspıı jaǵalaýynda atty áskerler bar. Astana qalasynda da qoǵamdyq tártipti qadaǵalaýshylardyń atpen júrgendigin kórýge bolady.

Qaz

Qytaıdyń Sınszán provınsıasynda úı qusy sanalatyn qazdardy aımaqtaǵy qylmystyq istermen kúres kezinde paıdalanady. Quqyq qorǵaý organdarynyń aıtýynsha: «Qazdar óte agresıvti, kózderi jaqsy kóredi. Olardyń daýystary da asa qatty. Negizinde ıtterge qaraǵanda tıimdi».

Bul tynyshtyq saqtaýdaǵy qazdardy alǵashqy ret qoldaný emes. B.z.d. 390 jyly Rımge galldardyń basyp kireýine osy qazdardyń ashshy daýysy men agresıvtiligi kedergi bolǵan desedi. Jáne 1986 jyly amerıkandyq áskerıler ózderiniń batys Germanıadaǵy áskerı obekterin qorǵaý úshin 900 qazdy qoldanǵan.

Kórtyshqan

Golandıa men Ýgandanyń polısıasynda izdeýshi ıtterdiń ornyna kórtyshqandardy jumysqa alǵan.  Onyń birinshi sebebi ıtterge ketetin shyǵyndar kóbeıip ketken. Al tyshqandardyń talaby ıtterdikindeı joǵary emes. Ekinshiden, olardy alyp júrý de asa qolaıly.

Kórtyshqandar negizinde jerastyndaǵy mınalardy tabý úshin qoldanady. Olardyń salmaǵy jeńil bolǵandyqtan mına ústinde turǵan kúnniń ózinde jarylys bolmaıdy.

Kesirke

2017 jyly AQSH-ta Arızona shtatyndaǵy Eıvondeıl qalasynyń departamentinde polıseı ofıseri etip kesirtke saılandy. Aıro laqapty kesirtke polıseı belgisin alyp, áskerı ant qabyldaǵan. «Zertteýlerde belgili bolǵandaı, kesirtkelerdiń qaýipti zattardy sezip, tabýǵa erekshe ıkemi bar ekeni anyqtalǵan», - deıdi óz sózderinde AQSH quqyq qorǵaý organdarynyń qyzmetkerleri.