Reseı Joǵarǵy soty «Iegova kýágerleri» dinı uıymyn ekstremıstik uıym dep tanyp, Reseı terıtorıasyndaǵy qyzmetine tyıym saldy, dep habarlaıdy Qamshy aqparattyq agenttigi Azattyq radıosyna silteme jasaı otyryp.

Sot sheshimi Reseı ádilet mınıstrliginiń shaǵymy boıynsha shyǵaryldy. Reseıde zańdy túrde tirkelgen dinı uıymdy ekstremıstik uıym dep tanyǵan oqıǵa birinshi ret bolyp otyr.

Sot sheshimi eń aldymen «Iegova kýágerleriniń» Sankt-Peterbýrgtegi ákimshilik ortalyǵyna jáne uıymnyń el aýmaǵyndaǵy qyzmetine áser etedi.

«Iegova kýágerleri» qazir uıymnyń 170 myńǵa tarta ókili baryn aıtady. Reseıde bul uıymǵa onyń áskerı qyzmet, saılaýǵa qatysý jáne jalpy memlekettik bılikke qatysty ózgeshe ustanymyna baılanysty burynnan kúdikpen qaraıtyn.

«Iegova kýágerleri» ortalyǵynyń málimdemesinde ortalyq qyzmetine tyıym salý onyń jaqtastaryn dinı senimi úshin, onyń ishinde İnjildi birge oqyp, birge qulshylyq qylatyny úshin ǵana qylmystyq qýdalaýǵa ulasýy múmkin deıdi.

AQSH memlekettiń departamenti 2016 jyly din ustaný erkindigi týraly jyl saıynǵy esebinde Reseıde dinı azshylyqty quraıtyn toptarǵa júıeli túrde qysym kórsetiletinin, al bas prokýratýra «Iegova kýágerleri» dinı uıymynyń barlyq 406 jergilikti dinı birlestigi men 2500-den astam qaýymyn ekstremızmge qatysy bar degen aıyppen jabýdy talap etip jatqanyn málimdegen.