Petropavlda úleskerlerdiń úıi Reseı prezıdentiniń kesirinen salynbaıtyn bolǵan dep habarlaıdy Qamshy aqparattyq agenttigi ktk.kz-ke silteme jasap. Qurylysty sozbalańǵa salǵan fırma ókilderi osylaı dep ýáj aıtty. Iaǵnı bul kompanıa ótken jyly Qyzyljarda josparlanǵan Qazaqstan men Reseıdiń shekaralas aımaqtary forýmynyń Astanaǵa aýysqanynan zardap shekken kórinedi. Byltyrdan beri qurylysshylarǵa tynyshtyq bermegen ákimdik endi úı turǵan jerdi kúshtep tartyp almaq. Al eki ortada úleskerler baspanadan da, aqshadan da aıyrylyp otyr.
«Kansam» qurylys fırmasynyń ókili Mahabbat Esenbaevany qorshap turǵan myna jurt – osy úıdiń úleskerleri. Ádette tóbe kórsetpeıtin ony búgin qala ákimi shaqyrtyp, halyqpen sóılesýge mindettepti. Aıtýynsha, úıdiń der kezinde salynbaýyna anaý-mynaý emes, Pýtınniń ózi kináli. Iaǵnı byltyr jazda Petropavlda eki eldiń shekaralas aımaqtarynyń forýmy ótýi tıis edi. Oǵan deıin qalanyń kire berisindegi bul ǵımarat salynyp bitýi kerek eken. Biraq saıası shara Astanada ótetin bop qalǵan.
Mahabbat Esenbaeva, qurylys fırmasynyń ókili:
-Keıin samıt ótpeıtin bolyp, Pýtın kelmeı qaldy. Sodan bastap ákimdik bizdi bul jerden ketirý úshin bárin istedi. Qaıta-qaıta tekserý jiberip, mursha da bergen joq. Aqyr sońynda qurylysqa bergen ruqsatynyń kúshin joıyp, jerdi memleket menshigine alý týraly sheshim shyǵardy.
Al ákimdiktegiler qurylysty sozbalańǵa salǵan fırmanyń ózin aıyptap otyr. Eger úı ýaqytyly, ıaǵnı byltyr jazda berilgende, oǵan eshkim tıispeýshi edi. Ári qańyrap turǵan ǵımarat qalanyń sánin ketiredi deıdi olar.
-Qalanyń bas jospary boıynsha bul jerde 9 qabatty úı bolady. Onyń qurylysy bir-eki aıda bastalmaq. Qurylysshylar tolyǵymen bul ǵımaratty buzyp, qaıta salamyz dep otyr. Óıtkeni onyń irgetasy tek úsh qabatqa ǵana eseptelgen eken.
Al barlyǵy 50 mıllıon teńgesin qurylysshylarǵa ustata salǵan 11 úleskerdiń jaǵdaıyn endi sot sheshpek. Bul iske qatysty tergeý amaldary da bastalypty. Úleskerlerdiń endigi úmiti tek ákimdikte.
Dınara Raqymjanova, Petropavl qalalyq ákimdigi ishki saıasat bóliminiń basshysy:
-Qazir kelisim komısıasy quryldy. Osyndaǵy qurylys materıaldarynyń, jerdiń quny eseptelip, fırmanyń atyna aqsha aýdarylatyn bolady. Óıtkeni zań boıynsha olar osy jerdiń ıeleri. Óz retinde bul fırma úleskerlermen eseptesýi tıis.
Sonymen 11 úleskerdiń pátersiz qalatyny anyq. Ákimdik fırmaǵa qansha aqsha aýdarady, onyń somasy japa shekken jurttyń bárine jete me, ol arasy ázirge belgisiz. Óıtkeni jurt eki ret sottalǵan fırma basshysyna asa senińkermeı de otyr.
