Pavlodar qalasyndaǵy kópqabatty úılerdiń birindegi bir bólmeli páterdiń túgi qalmaı órtenip ketti, dep habarlaıdy Qamshy aqparattyq agenttigi Baq.kz-ke silteme jasap.

 «Jeke quramnyń 15 órt sóndirýshisi qyzyl jalynmen 1,5 saǵat boıy arpalysty. Saldarynan úı jıhazdary, zattar men elektronıka quraldary janyp ketti. Qazirgi ýaqytta keltirilgen shyǵyn kólemi men oqys oqıǵanyń sebebi anyqtalyp jatyr. Aldyn ala boljam boıynsha órt toq symdarynyń tuıyqtalýynan oryn alǵan. Tilsiz jaý 18 sharshy metrlik aýmaqty jalmady», - deıdi vedomstvonyń baspasóz qyzmetiniń mamany Maral Saǵynaeva.

Páter ıesi Natalá Baımuratovanyń aıtýynsha, órt bolǵan kezde úıdegilerdiń barlyǵy syrtta bolǵan. Búginde 53 jastaǵy azamatsha bir bólmeli páterde qyzy jáne eki jıenimen turady.

«Abyroı bolǵanda, páterde eshkim bolmady. Qyzyl jalyn saldarynan úıimiz túgi qalmaı janyp ketti. Qańyraǵan qabyrǵalar ǵana qaldy. Jıenderimniń kúndelikti kıetin kıimi de joq. Olardy mektepke qalaı jiberemin? Ýaıymdap otyrmyn. Qolymda bolǵan qarajatqa ýaqytsha páter jaldadyq», - deıdi Natalá Baımuratova.

Bir qyzyǵy, Natalá Bekmuratovanyń páterinde bolǵan alapat órtten Quran kitaby ǵana aman qalypty.

«Qurannyń ishinde jıenderimniń týý týraly kýálikteri bolǵan edi. Qasıetti kitap janǵan joq», - deıdi páter ıesi.

Aıta keteıik, órtenip ketken páter buryn jataqhana bolǵan kópqabatty úıde ornalasqan. Tótenshelikterdiń aıtýynsha, órt qaýipsizdigi saqtalmaıtyn osy tektes nysandarda turý asa qaýipti. Keńestik kezeńde salynǵan nysandarda órt oqıǵalary jıilep ketken. Osyny qaperge alǵan tótenshelikter turǵyndar arasynda órt qaýipsizdigi boıynsha túsindirý jumystaryn júrgizip, ár páterdi aralap shyǵýdy ádetke aınaldyrǵan. Jalpy, oblys ortalyǵynda jylytý kezeńi bastalǵaly beri óńirde 120-dan astam oqys oqıǵa tirkelgen. Saldarynan turǵyndarǵa keltirilgen shyǵyn kólemi 15 mln teńgeden asyp jyǵylǵan. Ókinishke qaraı, gazdan ýlanyp, órtten kóz jumǵandar sany arta túsken. Qarapaıym órt qaýipsizdigi erejelerin saqtamaý saldarynan 15 adam qaıtys bolǵan.