Qaraǵandylyq rep-oryndaýshylar jekpe-jek sheberi Sergeı Morozovqa arnap beınebaıan túsirdi

    Zhazira Baidaly
    Qaraǵandylyq rep-oryndaýshylar jekpe-jek sheberi Sergeı Morozovqa arnap beınebaıan túsirdi

    Eń tartysty sporttyq jarystardyń biri – aralas jekpe-jekten M-1 Challenge 76 halyqaralyq týrnıri 22 sáýir Nazranı (Ingýshetıa) qalasynda ótedi. Atalmysh halyqaralyq aralas jekpe-jekte el namysyn aralas jekpe-jekter boıynsha Qazaqstan chempıony, Azıa chempıonatynyń kúmis júldegeri, aralas jekpe-jek boıynsha álem birinshiliginiń vıse-chempıony Sergeı Morozov qorǵaıtyn bolady.

    Talantty sportshynyń jankúıerleri qaraǵandylyq rep-oryndaýshylar Ákejan Luqpanov pen Anton Zenın sportshyny qoldap, án jazyp, beınebaıan túsirdi. Ondaǵy maqsattary – qazaqstandyqtardy otandasymyzǵa jankúıer bolýǵa shaqyrý.

    - Barlyǵy oılamaǵan jerden boldy. Dosym Ákejan Sergeıdiń myqty jigit ekenin, keremet kúresetinin aıtty. Osylaısha biz óz sportshymyzdy qoldap, beınebaıan túsirýge bel býdyq. Bul – qanattandyratyn án. Onda tek sportshymyzǵa degen qoldaýymyz ǵana emes, Otanymyz – Qazaqstanǵa degen ystyq yqylasymyzdy jetkizdik,  - dedi B.u.ll.d.o.G degen laqap atty reper Anton.

    Rep-oryndaýshy Ákejan DIEZO Luqpanov:

    - Men ózim eki jyl jekpe-jek ónerimen aınalysqanmyn. Jáne Sergeı Morozovty kópten baıqap júrmin. Onyń kúresý máneri, adamgershiligi unaıdy. M1 Global halyqaralyq kompanıasymen kelisimshart jasasqan alǵashqy qazaqstandyq sportshy bolǵanyna qaramastan, qarapaıymdylyǵyn joǵaltpaǵan jan. Sondyqtan ony qoldaǵymyz keldi.

     Halyqaralyq týrnırde qazaqstandyq sportshynyń qarsylasy brazılıalyq chempıon Fabrısıo Sarraf bolmaq. Sergeı Morozov týrnırge daıyndyqtyń negizgi kezeńin aıaqtady. Qazirgi tańda ol tájirıbeli bapkerlerimen týǵan qalasy Aqtóbede jattyǵýda.

    - Árıne, alǵa túspeı-aq qoıaıyn. Alaıda, tek jeńiske degen umtylys bar. Men onda jeńý úshin baram. Bul jekpe jektiń men úshin mańyzy úlken. Ótken joly Ingýshetıada jeńilis tapqan edim... Maǵan boıymdy tiktep, qarymta qaıtarýǵa múmkindik bergenine qýanyshtymyn. Meni ondaǵylar jaqsy biledi, maǵan jankúıer bolyp, qoldaý kórsetýde. Jeńis ne jeńilis bolatynyn tek rıng sheshedi. Tek sharshy alańda ǵana qarsylastyń qandaı artyqshylyqtary bar ekeni túsinikti bolady. Alaıda men jeńis úshin bara jatyrmyn», - deıdi sportshy.

    Aıta keteıik, M-1 Challenge – 2008 jyldan bastap ótkizile bastaǵan aralas jekpe-jekter boıynsha týrnırlerdiń tutas toptamasy. Sodan beri álemniń túrli elderinde 75 týrnır ótip úlgerdi. 2010 jyly komandalyq jarystan alshaqtap, chempıondar beldigin bes salmaq dárejesinde oınatý týraly sheshim qabyldandy.

    Halyqaralyq aralas jekpe-jekti qazaqstandyqtar Eýrazıa birinshi arnasynan 22 sáýir kúni 23:00-de tamashalaı alady. 

    Qatysty Maqalalar

    Úzdik tenısshiler anyqtaldy

    Úzdik tenısshiler anyqtaldy

    16:59, 06 sáýir 2026