Aýyt Muqıbek oralmandardyń datyn Aqordaǵa taǵy jetkizdi. Ol 18 tamyz kúni sheteldegi qandastarymyzdyń máselesine baılanysty Prezıdent keńsesiniń bastyǵy Mahmut Qasymbekovtyń qabyldaýynda bolyp, ózgertýler men tolyqtyrýlar engizilgeli jatqan Kóshi-qon zańyna qatysty usynystaryn jetkizse, 19 tamyzda Aqordadaǵy Prezıdent keńsesine QR Prezıdenti Ákimshiliginiń basshysy Nurlan Nyǵmatýllınniń atyna jazylǵan eki usynys hat daıyndap aparyp tapsyrǵan bolatyn. Oralmandar máselesin jıi kóterip, qandastar máselesin bıliktiń esine umyttyrmaı salyp júrgen Aýyt Muqıbek Parlament Májilisiniń depýtaty Nurtaı Sabılánov myrzanyń da keshe qabyldaýynda bolǵanyn jazǵan edi. Aqynnyń Facebook-tegi jazbasynan Depýtat Nurtaı Salıhulynyń «Elbasyǵa sóz keltirmeıtin, kemeldi Zań jobasyn qabyldaýǵa qulshynyp otyrǵanyn» baıqaǵan bolatynbyz. Aýyt Muqıbek búgin Prezıdent keńesshisi Muhtar Qul-Muhammed myrzaǵa da qandastarymyzdyń máselesin jetkize bardy. Bul týraly ol Facebook paraqshasynda:
«Búgin saǵat 16;00-de Aqordada Qazaqstan Respýblıkasy Prezıdentiniń keńesshisi Muhtar Qul-Muhammed myrzanyń qabyldaýynda boldym. Muhtar Abraruly meni Elbasy tapsyrmasy boıynsha qabyldaǵanyn aıta kelip, alda qabyldanatyn Kóshi-qon Zańy jóninde óz oılaryn, jumys barysyn áńgimelep berdi. Arǵy bette týǵan, ulken kisilerden qazaqtyń arǵy-bergi tarıhyn qulaǵyna qarshadaıynan quıyp ósken, bertin kele zań ǵylymynan doqtorlyq qorǵaǵan, asa jaýapty qyzmetterdi abyroımen atqarǵan tulǵaǵa shettegi qandastar, Kóshi-qon jáne onyń mańyzy týraly túsindirip otyrý maǵan yńǵaısyz, árıne. Desede, sóz oraıy kelgende, aıtýǵa tıisti máselelerdi irikbeı aıttym, óz tilekterim men usynystarymdy jazbasha túrde jetkizdim. Atalmysh Zań jobasynyń múltiksiz qabyldanýyna yqpal etýin barynsha ótindim. Sóz sońynda bar usynysyńdy Elbasyǵa jetkizem dedi Muhtar Abraruly», - dep jazdy. Jazba avtory Qytaıdyń "qyzyl spravkasynyń" bir dana kóshirmesin, Qytaı Kóshi-qon zańy men azamattyqtan shyǵarý tártibin de Prezıdent keńesshisine jetkizgen. Qytaıdyń azamattyqtan shyǵarý tártibi men Qazaqstannyń azamattyqqa qabyldaý tártibi bir-birine kereǵar ekeni únemi jazylyp keledi.
Bıyl sáýir aıynda mınıstr Tamara Dúısenova shetelden kelgen qandastarǵa jaǵdaı jasalatynyn, olarǵa bir jyldyń ishinde azamattyq berý máselesi qolǵa alynatyn málimdegen edi. Alaıda atalǵan zań áli bekitilgen joq. Elbasy Nazarbaev ta tamyzdyń 6-syndaǵy úkimettiń keńeıtilgen otyrysynda «oralmandarǵa jaǵdaı jasalýy kerek» degen bolatyn. Aqyn Aýyt Muqıbek Aqordaǵa jıi bas suqsa, qazaq tildi saıttarda qalyspaı sheteldegi qandastarymyzdyń elge tezirek oralý men azamattyqqa qabyldaný jaıyn úzbeı qońyraýlatyp keledi. Qazaq kóbeımeı qazaqtyń máselesi sheshilmeıtinin bılik bárimizden jaqsy biledi dep senemiz.
Nurǵalı Nurtaı
