Saýd Arabıasyna qajylyq ǵıbadatyn óteý úshin álemniń túkpir-túkpirinen 900 000 musylman aıaq basty. Bul týraly QazAqparat «Nur Astana» meshitine silteme jasap habarlady.
Bıyl Saýd koróldigine qajylyq jasaýǵa kelýshiler sany byltyrǵy derekpen salystyrǵanda 7 paıyzǵa artqan. Mekkedegi ál-Haram meshitin qalpyna keltirý jumystarynyń júrgizilip jatqanyna qaramastan munsha adamnyń jınalýy aıtarlyqtaı kórsetkish bolyp tabylady.
Qajylyq musylmannyń bes paryzynyń biri jáne sońǵysy bolyp tabylady. Sharıǵat boıynsha kámeletke tolǵan, aqyl-esi durys, densaýlyǵy jaqsy, dáýleti jeterlik, ózgege qaryzy joq musylman ǵana bul paryzyn óteı alady. Onyń paryzdyǵy qasıetti Quranda: «Alla úshin Qaǵbany adamdarǵa qajylyq etý paryz» («Álı-Imran» súresi, 97 aıat), - dep uqtyrylsa, hadıs sharıfte: «Islam bes negizge qurylǵan: Alla Taǵaladan basqa táńir joq jáne Muhammed onyń elshisi dep kýálik etý. Namaz oqý. Zeket berý. Ramazan aıynda tolyq oraza ustaý. Baıtýllaǵa qajylyqqa barý», - delingen.
Sharıǵatta - arnaıy ýaqytta ıaǵnı qasıetti ramazan aıynan keıingi aıdan bastap zúlhıjja aıynyń 10-12 kúnderine deıin arnaıy mekende ıaǵnı Saýd Arabıasynyń Mekke qalasynda tabylyp, arnaıy bekitilgen ıhramǵa kirý, Kaǵbany jeti aınalyp táý etý, Safa men Marýa arasynda saǵıı jasaý, Arafada turý, Muzdalıfada túneý, shaıtanǵa tas atý sıaqty amaldardy oryndaý dep túsiný lázim. (Qazaqsha Wikipedia-dan alyndy)
Qamshy-aqparat
