Qytaıdyń uıǵyrlarǵa baǵyttalǵan aýyr jazalaý saıasaty jalǵasýda. Bul týraly Túriktiń TRT-qazaq arnasy habarlady.

Uıǵyr Avtonomıalyq aımaǵynyń Qashqar qalasy soty Imam Juma Tahırdiń óltirilýimen baılanysty 2 uıǵyrǵa ólim jazasyn, 1 uıǵyrǵa ómir boıy bas bostandyǵynan aıyrý jazasyn kesken. Qytaı soty uzaq ýaqyttan beri daǵdarystar jalǵasqan Uıǵyr Avtonomıalyq Aımaǵynda terror jáne bólshektenýshilikpen aıyptaǵan kisilerge aýyr jazalar berip keledi. Qashqar soty 2 uıǵyr jasqa «terror uıymy qurý jáne qastandyq jasaý» aıyptaryn taǵyp otyr.

Qytaı soty qyrkúıek aıynyń basynda ǵana 3 uıǵyrǵa qandy Kýnmıng shabýyldaryna qatysty degen aıyp taǵyp, darǵa asý jazasyn bergen bolatyn. Ótken aptada ulty uıǵyr ǵalym  Ilham Tohtyny ómir boıy bas bostandyǵynan aıyrýy batystyq saıasatkerlerdiń narazylyǵyn týdyrǵan edi. Resmı derek boıynsha Shyńjań ólkesinde  1,5 jylda qaqtyǵystar saldarynan 400-ge jýyq adam qaza tapqan.

Qamshy-aqparat