Zańǵa jaýapty mınıstr zańdy buzyp otyra bere me?
Memlekettik qyzmetkerleri memlekettik tilde sóılemeıtin álemdegi jalǵyz el – Qazaqstanda taǵy bir bildeı mınıstr qazaqsha sóıleı almaı, «bir jylda úırenip alamyn ǵoı» dep qutyldy… Mınıstr bolǵanda da anaý-mynaý emes, zańǵa jaýap beretin Ádilet mınıstri! Iá, sol, birden bildińiz, rólge iship alyp otyryp, İshki isterdiń qolyna túsip, baspasózdi shýlatqan Marat Beketaev!
Esimizge túsip otyr, 2004 jyly Parlament saılaýy bitkesin, sol kezdegi Saılaý komısıasynyń tóraıymy Zaǵıpa Balıeva Ádilet mınıstri bolyp ketkende jazǵan: «Ádiletsiz saılaý ótkizseń, Ádilet mınıstri bolasyń» degen sózimiz mátelge aınalyp ketip edi… Ótkende de Marat Beketaev Ádilet mınıstri bolǵanda baspasózde «İship alyp kólik basqara almasań, Ádilet mınıstrligin basqarasyń» degen sóz jeldeı gýlep ketti…
Sonda zańǵa jaýapty mınıstr zańdy buzyp otyr ǵoı… Zań bolǵanda da Qazaqstannyń Ata zańy – Konstıtýsıanyń 7- baby, 1-shi tarmaǵyn buzyp qoıyp, jaǵasy jaılaýda jaıbaraqat esip júr…
Bulardyń aldynda qansha mınıstr, qansha ákim osyndaı ýáde bergeninen jańylyp ta qaldyq. Ótkende Ulttyq ekonomıka mınıstri, endi Ádilet mınıstri, erteń qaı mınıstr «Qazaqshany bir jylda úırenemin» dep, Qazaqty aldap qoıyp, otyra beredi?
Bul bulardyń Eldi aldaǵany ma, Elbasyny aldaǵany ma?..
Eks-syrtqy ister mınıstri Erlan Ydyrysov sıaqty: «Basyma operasıa jasap, mıymdy aýystyrmasańdar, qazaq tilin úırena almaımyn»-degeninen góri «bir jyl bolsa da, úırenemini» durys qoı dep, soqyr úmittiń sońynda salpaqtap kele jatqanymyzǵa shırek ǵasyr boldy…
Qazaqstanda qazaqsha bilmeseń – mınıstr bolasyń!.. Ózbekstanda ózbekshe bilmeseń, arba da aıdaı almaısyń… Ózbekstandy ózimizdiń týysqan, kórshiles básekeles el bolǵan soń mysalǵa keltirip otyrmyn. Áıtpese, álemniń bar elinde sol, memlekettik tildi bilmeseń, memlekettik qyzmettiń mańyna da jýıı almaısyń! Tek Qazaqstannan basqa…
Elbasymyz aıtqan Rýhanı jańǵyrýdaǵy Ulttyq kody joqtar Ultty qalaı jarylqamaq?
Ulttyq jańǵyrýdy mınıstrlerden bastap, memlekettik jaýapty qyzmetterge Reseıdiń memlekettik tilin emes, Qazaqstannyń memlekettik tilin biletinderdi alýdan bastaý kerek!
Qazybek ISA
