Jaqsy ánshi ánniń baǵyn ashsa, jaqsy án de ánshige jol ashary sózsiz. Bul aqıqat. Bir ánmen ǵana tanylǵan ánshiler kóp.

Ibragım Eskendirdiń esimi qazir kópke tanymal. Ánshi retinde ony halyqqa tanytqan Almas Ahmetbekulynyń sózine jazylǵan Ermurat Zeıiphanulynyń «Kók týdyń jelbiregeni» atty áni. Kóp jyl buryn jazylyp birneshe oryndaýshysy bolsa da osy ánniń baǵyn ashqan Ibragım baýyrymyz boldy. Qazaqy áýen qosylǵan án ásirese 2016 Rıo-de-Janeıroda ótken olımpıada kezinde elimizdiń sportshy oǵlandary jeńis tuǵyrynan kóterilgen sátterinde «Qazaqstan», «Habar» sekildi telearnalardyń efırinen túsken joq. Kóptegen sporttyq  jáne basqa sharalar kezinde áli de oryndalyp keledi. Halyq ta tez qabyldady. Patrıottyq sezimdi oıatyp-aq tastaıdy.

Óz basym I.Eskendir oryndaǵan ánderdi súıip tyńdaımyn. Sonyń biri «Amanat» áni. Oǵan túsirgen beınebaıan da sátti shyqty.

Tuıaǵy tozǵan tulpardyń,

Qanaty talǵan suńqardyń,

Atadan qalǵan kıeli bul jer

Amanat bizge, amanat!- dep keletin qaıyrmasymen qosylyp osy ánge óziń de ilesip yńyldap otyrǵanyńdy bilmeı qalasyń.

Jaqynda áıgili Amerıkalyq akter Sılvestr Stallonnyń rejıserligimen ózi basty rólde oınaǵan «Rembo 4» fılmin tamashalap otyrǵan bolatynmyn. Fılmniń 5 mınýtynan keıin oınalyp jatqan mýzykany tyńdaǵan kezde óz qulaǵyma ózim senbedim. «Amanat» ániniń bastalý shaǵyndaǵy áýen oryndalyp jatyr (mýzyka tilinde saýndtrekt dep aıtylady eken). Tup-týra 1 mınýt 15 sekýnt. Tek «Amanatqa» qaraǵanda sál baıaý. Al bizdiń  Eskendir ony óz daýysymen oryndap tur.

«Rembo 4» fılmindegi saýndtrektiń avtory Brian Tyler. Saýndtrekt «Theme Rambo» dep atalady.  Ol tanymal Amerıkalyq kompozıtor jáne drıjór. Kóptegen fılmderge saýndtrek jazǵan degen derek ǵalamtorda tur.

«Rembo 4» 2008 jyly túsirilgen. Al I.Eskendirdiń «Amanaty» dál qashan jazylǵanyn bilmeımin. «Kórmeıin desem kózim bar...» demekshi bizdiki tek estigen qulaq. Jazyq joq. Al shyndyǵyn tek Ibragım baýyrymyz aıtpasa...

A.Manapov

,